სამცხე–ჯავახეთში ნატოს საინფორმაციო ცენტრის ოფისი გაიხსნება

კვირეული, 4 აპრილს, ნატო-საქართველოს სახალხო დიპლომატიის ფორუმით დაიწყება, რომელსაც გახსნიან საქართველოს პრემიერ-მინისტრი გიორგი კვირიკაშვილი, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე და ნატოს გენერალური მდივნის მოადგილის თანაშემწე ტედ ვაითსაიდი, ხოლო 5 აპრილს ფორუმს გახსნიან საქართველოს პრეზიდენტი გიორგი მარგველაშვილი და საქართველოს თავდაცვის მინისტრი თინათინ ხიდაშელი.

ნატოს საინფორმაციო ცენტრის ინფორმაციით, ფორუმში მონაწილეობას მიიღებენ აღმასრულებელი და საკანონმდებლო ხელისუფლების წარმომადგენლები, სახალხო დიპლომატიასა და კომუნიკაციების საკითხებზე მომუშავე სამთავრობო სტრუქტურებისა და ნატოს შტაბ-ბინის წარმომადგენლები, მოწვეული ექსპერტები. ფორუმზე განიხილავენ უახლეს ტენდენციებს, გამოწვევებსა და სიახლეებს სახალხო დიპლომატიისა და კომუნიკაციის სფეროში.

კვირეული 19 აპრილამდე გაგრძელდება. დედაქალაქსა და რეგიონებში დაგეგმილია სხვადასხვა ტიპის ღონისძიება. მათ შორის, ორდღიანი სემინარი სამცხე- ჯავახეთის რეგიონის ეთნიკური უმცირესობების წარმომადგენელი პედაგოგებისთვის, საინფორმაციო ცენტრის ახალქალაქის რეგიონული ოფისის გახსნა, სემინარი ჟურნალისტებისთვის კრწანისის ეროვნულ სასწავლო ცენტრში, სამხრეთ კალიფორნიის უნივერსიტეტის პროფესორის შეხვედრა სტუდენტებთან, ნატოსა და ევროკავშირის აუდიტორიების გახსნა უნივერსიტეტებში, საინფორმაციო ტური ოზურგეთის მუნციპალიტეტის სტუდენტებისთვის, 2008 წლის აგვისტოს ომსა და ISAF-ის მისიაში დაღუპული სამხედრო მოსამსახურეების შვილების ნახატების გამოფენა, ვიზიტები კრწანისის ეროვნულ სასწავლო ცენტრში, საჯარო ლექციები, კონკურსები, კონფერენციები, დებატები, მოხალისეების ვიზიტი პრეზიდენტის სასახლეში, მინი ტურნირი ფეხბურთში და სხვ.

ნატოს კვირეული საქართველოში წელს მეცხრედ ტარდება. ღონისძიება სსიპ "ნატოსა და ევროკავშირის შესახებ საინფორმაციო ცენტრის" ორგანიზებით და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის, თავდაცვის სამინისტროს, საქართველოში ნატოს სამეკავშირეო ოფისისა და რუმინეთის საელჩოს მხარდაჭერით ხორციელდება.

[ნინო ნარიმანიშვილი, ახალციხე]