ადიგენში სპორტსკოლა დაიწვა

სახანძრო სამსახურში ზარი დაახლოებით დილის 6 საათზე შევიდა. შემთხვევის ადგილზე ორი ჯგუფი გავიდა, თუმცა, მათ შენობა თითქმის დამწვარი დახვდათ.

ადიგენის მუნიციპალიტეტის გამგეობაში ამბობენ, რომ ზედაპირული გათვლებით ზარალი 20,000-დან 25,000 ლარამდეა. მთლიანად დაიწვა შენობა და განადგურდა სპორტსკოლის ყველა ინვენტარი.

დაბა ადიგენის ცენტრალურ მოედანზე, სადაც სპორტსკოლა მდებარეობდა, 20 სექტემბერს ”ქართული ოცნების” აქცია და ბერას კონცერტია დაგეგმილი. ადიგენის მუნიციპალიტეტის გამგებელი სიმონ პარუნაშვილი არ გამორიცხავს, რომ შესაძლოა ხანძარი ამ ფაქტს დაუკავშირონ: ”რაც შეეხება 20 სექტემბერს დგეგმილ აქცია-კონცერტს, ხელი არ შეეშლებათ. უკვე დასუფთავებულია მოედანი, ელექტროენერგიაც იქნება”.

”ქართული ოცნების” ადიგენის შტაბში პროვოკაციის მცდელობას კატეგორიულად გამორიცხავენ და ამბობენ, რომ ხმებს ხანძართან მათ სავარაუდო კავშირზე ადგილობრივი ხელისუფლების წევრები ავრცელებენ.

”სიმართლე გითხრათ, არ ვიცი რა მოხდა, მაგრამ უკვე რამდენიმე ადამიანი მოვიდა, ვინც მითხრა, რომ ავრცელებენ ხმებს, რომ მიმდინარეობს გამოძიება და ჩვენი ხელი ურევია ამ ამბავში. შეიძლება შემთხვევითობა იყო, მაგრამ ასეთი შემთხვევითობებიც იშვიათად ხდება ხოლმე. და ცხადია, რაღაც შეკითხვები გაჩნდება”, - აცხადებს ”ქართული ოცნების” ადიგენის შტაბის ხელმძღვანელი დავით ბაციკაძე.

ბაციკაძის მოსაზრებას კატეგორიულად ეწინააღმდეგებიან ადგილობრივ ხელისუფლებაში.

”არავინ არაფერს ავრცელებს. ხელი არ ეშლებათ, ატარებენ კონცერტს! ვინ და როგორ გააჩინა, ამას შესაბამისი სამსახური დაადგენს”, - აცხადებს მუნიციპალიტეტის გამგებელი.

შემთხვევის ადგილი უკვე დასუფთავებულია ხანძრის ნარჩენებისგან. მომხდარს კრიმინალისტიკური სამსახური იკვლევს.

[ნინო ნარიმანიშვილი, ადიგენი]