ადიგენის სოფლებში დაშინებაზე საუბრობენ

ტელეკომპანია ”მეცხრე არხის” ინფორმაციით, ”კარდაკარის” მონაწილეები ადიგენის მუნიციპალიტეტის მოსახლეობამ სახლში არ შეუშვა. ამის მიზეზად ზარზმაში მცხოვრებლებმა პოლიციის მხრიდან ზეწოლა დაასახელეს. სოფელ ფხეროში კი ”კარდაკარის” სამუშაოების შეწყვეტა მონაწილეებს სოფლის რწმუნებულმა მოსთხოვა.

- ”სოფელში არ შეგვიშვეს, იმიტომ, რომ პოლიციის თანამშრომლები სოფელში ამოვიდნენ და მოსახლეობა დააშინეს. ზოგს დაჭერით ემუქრებიან და სოფელმა აღარ მიგვიღო”, - ამბობს ”კარდაკარის” ერთ-ერთი მონაწილე დავით ლობჟანიძე.

- ”მოსახლეობამ გვითხრა, რომ გაფრთხილებული არიან სოფლში და სახლებში არ შეგვიშვან”, - აცხადებს ”კარდაკარის” მონაწილე იგორ დავაძე.

”ქართული ოცნების” ადიგენის შტაბის უფროსი ბესიკ ჩხიტუნიძე სატელეფონო საუბარში ადასტურებს, რომ ადიგენის მუნიციპალიტეტის სოფელ ზარზმაში მათ აქტივისტებზე ზეწოლის ფაქტები დაფიქსირდა.

მისივე თქმით, ადგილობრივი ხელისუფლების წარმომადგენლები მოქალაქეებს აფრთხილებენ, რომ ”ქართული ოცნების” წარმომადგენლები სიების გადასამოწმებლად სახლში არ შეუშვან. კონკრეტულ პრიოვნებას, რომელიმაც მათ აქტივისტებს საქმიანობაში ხელი შეუშალა, შტაბის უფროსი არ ასახელებს.

ადიგენის მუნიციპალიტეტის გამგებელი სიმონ პარუნაშვილი აცხადებს, რომ ადიგენში მომხდართან დაკავშირებით არანაირ ინფორმაციას არ ფლობს: ”ჩვენ ხელს არავის არაფერში არ ვუშლით”.

[თამარ თოთაძე, ახალციხე]