ადიგენელთა ნაწილი გამგებლის შეცვლას ითხოვს

მუნიციპალიტეტის გამგებლის გადაყენების მოთხოვნით, მოსახლეობის ნაწილი დღეს ადიგენის გამგეობის შენობასთან საპროტესტო აქციის გამართვასაც გეგმავს.

„ქართული ოცნების“ ადიგენელი აქტივისტი თემურ ნარიმანიშვილი, რომელიც ამავე დროს „ქართული ოცნების“ ადიგენის საარჩევნო შტაბის ხელმძღვანელის ბიძინა გუჯაბიძის ნდობით აღჭურვილი პირია, აცხადებს რომ „ოცნებას“ მოსახლეობის ამ ჯგუფთან შეხება არ აქვს: „არიან ხალხი, არაჯანსაღად მოაზროვნეები, რომლებიც ითხოვენ გამგებლის გადადგომას. თუმცა, ეს მათი გადასაწყვეტი არ არის და ეს არის საკრებულოს განსახილველი. ეს პროცესები უნდა განვითარდეს ცივილურად“.

იგივეს აცხადებს ბიძინა გუჯაბიძეც: „მიმდინარეობს ჩვეულებრივი პროცესი, არავითარი ჩარევა და არავითარი შეჭრა-შემოჭრა ადიგენში არ ხდება. ხელისუფლების ცვლასთან ერთად ჩვეულებრივად იცვლებიან თვითმმართველობის წევრებიც, მაგრამ ვიმეორებ, ეს არ არის იძულებითი პროცესი“.

ძეწოლისა და იძულების ფაქტებს უარყოფს ადიგენის მუნიციპალიტეტის გამგებელი სიმონ პარუნაშვილიც: „არაფერი არ ხდება, არანაირი შეხლა-შემოხლა, არავის არაფერი მოუთხოვია. გამგეობის შენობასთანაც სიმშვიდეა“.

თემურ ნარიმანიშვილი აცხადებს, რომ ადიგენში გამგებლის შეცვლა ნამდვილად იგეგმება. „ქართული ოცნების“ თბილისის ოფისში შექმნილია კომისია, რომელშიც კოალიციაში შემავალი ყველა პარტიის წევრია გაერთიანებული. სწორედ ეს კომისია განიხილავს გამგებლობის სავარაუდო კანდიდატებს: „რამდენადაც ვიცი, არის ოთხი კანდიდატი, მათ ვინაობას ვერ დავაკონკრეტებ. ამ ეტაპზე მიმდინარეობს განხილვა, შეირჩევა ბიძინა გუჯაბიძის რეკომენდაციით და საბოლოო რეზოლუციას დაადებს კომისიის თავმჯდომარე დავით საგანელიძე“.

მოსალოდნელ საკადრო ცვლილებებზე ადიგენის მუნიციპალიტეტის გამგეობაში არ საუბრობენ. მათი განცხადებით, მუშაობას ჩვეულ რეჟიმში აგრძელებენ. თუმცა, საკრებულოში დაწყებულია ფრაქცია „ქართული ოცნება-რესპუბლიკელების“ შექმნა.
ადიგენის მუნიციპალიტეტის საკრებულოს თავმჯდომარე გივი ენდელაძე ამბობს, რომ ფრაქციის საკითხი ბიუროს სხდომაზე უკვე განიხილეს. ამ ეტაპზე ფრაქციაში სამი წევრია. ჯამში, ადიგენის მუნიციპალიტეტის საკრებულოში 24 დეპუტატია.

[ნინო ნარიმანიშვილი,ადიგენი]