”ქართული ოცნების” ადიგენის შტაბმა კარვიდან ოფისში გადაინაცვლა

როგორც კოალიციის შტაბის ხელმძღვანელი დავით ბაციკაძე აცხადებს, ახალი შტაბის პრეზენტაციას რამდენიმე წუთში გამართავენ.

”ორი ბინა ვიქირავეთ, ორივე ადგილობრივი მცხოვრებისაა, ხელშეკრულებები გაფორმებულია, პრობლემები არ შეგვქმნია”, - განაცხადა ბაციკაძემ.

მისივე თქმით, ერთ-ერთი ქალბატონი მათ თავად დაუკავშირდა, მას შემდეგ, რაც ტელევიზიით კოალიციის კარვის შესახებ შეიტყო. ბაციკაძის განცხადებით, ორივე ბინის მფლობელი უმუშევარია.

15 აგვისტოდან დღემდე კოალიციის შტაბი ადიგენის რაიონული სამმართველოს გვერდით დადგმულ კარავში ფუნქციონირებდა. კოალიციაში აცხადებდნენ, რომ თვენახევრის განმავლობაში უშედეგოდ ცდილობდნენ ბინის დაქირავებას. ადგილობრივები ფართის მიქირავებაზე შიშის გამო ეუბნებოდნენ უარს. მაშინ კოალიციამ შტაბი ვერც აქტივისტების ბინებში გახსნა, იმის გამო, რომ არცერთი მათგანის საცხოვრებელი მათ სახელზე რეგისტრირებული არ იყო.

[ნინო ნარიმანიშვილი, ადიგენი]