საჯარო სკოლებში სამედიცინო კაბინეტების მოწყობა გრძელდება

ახალციხის პირველი საჯარო სკოლის დირექტორი ჟუჟუნა გოგოლაური ამბობს, რომ სკოლაში სამედიცინო კაბინეტის მოწყობის პროცესი გასული წლის სექტემბრიდან დაიწყო. ამ ეტაპზე კაბინეტი უკვე მზადაა და ფუნქციონირებს.

რაც შეეხება მესამე საჯარო სკოლას, როგორც სკოლის დირექტორი სვეტლანა არუთუნიანი ამბობს, სამედიცინო კაბინეტი მზად არის, თუმცა სკოლას ექიმი არ ჰყავს.

„ჩემი ინფორმაციით, აღნიშნულ ვაკანსიაზე 4 განაცხადია შესული. ამ კანდიდატურებს რესურსცენტრი განათლების სამინისტროს გადაუგზავნის, განიხილავენ და ამის შემდეგ დაინიშნება”, – ამბობს იგი.

როგორც განათლების სამინისტროში აცხადებენ, ამ პროექტის ამოქმედება გადაუდებელმა აუცილებლობამ განაპირობა: „წლების განმავლობაში სკოლების უმეტესობა დამოკიდებული იყო მხოლოდ სასწრაფო-სამედიცინო დახმარების მომსახურებაზე და არ იყო ჩართული იმუნიზაციის ხელშემწყობ პროცესებში. არ არსებობდა სკოლის მოსწავლეთა ჯანმრთელობის მდგომარეობის მონაცემთა ბაზა. იყო ეპიდემიოლოგიურად არაკეთილსაიმედო მდგომარეობა და ჰიგიენის საკითხებთან დაკავშირებით ცოდნის ნაკლებობა. ყველა ეს პრობლემა ახალი პროექტის ფარგლებში გადაიჭრება. მოსწავლეები, საჭიროების შემთხვევაში, კვალიფიციურ პირველად სამედიცინო დახმარებას სკოლაშივე მიიღებენ“.

სამინისტროს ინფორმაციით, საჭირო ინვენტარით, მედიკამენტებითა და სხვა აუცილებელი რესურსებით აღჭურვილი ექიმის კაბინეტი ყველა საჯარო სკოლას ექნება.

კაბინეტებისთვის ექიმების შერჩევას საქართველოს შრომის, ჯანმრთელობისა და სოციალური დაცვის სამინისტროს მიერ შექმნილი კომისია უზრუნველყოფს, სამედიცინო კაბინეტების მოწყობასა და აღჭურვას კი, საქართველოს განათლებისა და მეცნიერების სამინისტრო აფინანსებს.

[მანანა სარაშვილი, ახალციხე]