სკოლებში ექიმები არაა, ბავშვების ექსკურსიებზე მათი წაყვანა კი აუცილებელი ხდება

ექიმის გარეშე ბავშვების ექსკურსიებზე წაყვანა 2020 წლიდან აიკრძალება. კანონპორექტის თანახმად, თუ სკოლას ექიმი არ ჰყავს, მაშინ ჯგუფს თან უნდა ახლდეს პირი, რომელიც პირველადი სამედიცინო დახმარების გაწევაში გადამზადებულია. ასეთი პირი შეიძლება იყოს მანდატური, ან მშობელიც კი.

ახალციხის სკოლებში ბავშვების უსაფრთხოების მიზნით კანონის გამკაცრებას მიესალმებიან, თუმცა განსაკუთრებით სოფლების სკოლებში ფიქრობენ, რომ ამისი შესრულება რთული იქნება.

„ექსკურსია ბევრი ტარდება, მაგდენი ექიმი კი არაა. თუ აქცენტი მხოლოდ პირველადი სამედიცინო დახმარების გაწევაში გადამზადებულ პირებზე გაკეთდება, ასე შესაძლოა ექსკურსიების რაოდენობამ არ იკლოს, თორემ ისე ამდენი ექიმის ნახვა ძალიან გაჭირდება“, – ამბობს სოფელ მინაძის საჯარო სკოლის მასწავლებელი დონარი ზედგინიძე.

ახალციხის პირველი საჯარო სკოლის დირექტორი გამოსავალს კოლექტიური ექსკურსიების მოწყობაში ხედავს: „შესაძლებელია გავაკეთოთ კოლექტიური ექსკურია, ერთ შაბათ-კვირას ერთ მარშრუტზე რამდენიმე კლასი გავუშვათ, მეორე შაბათ-კვირას კი სხვა, ან უზრუნველვყოთ ექსკურისიების ისე დაყოფა, რომ თითო ჯგუფს თან თითო გადამზადებული კადრი მაინც ახლდეს“.

არც ახალციხის პირველ და არც მინაძის საჯარო სკოლებს ექიმები არ ჰყავთ.

„აქამდე სადაც მივდიოდით, ყოველთვის თან დამქონდა პირველადი დახმარებისათვის საჭირო ნივთები და მედიკამენტები. ჯერ რაიმე ინცინდენტი არ გვქონია. რა თქმა უნდა, თუ ექსკურსიაზე ბავშვებთან ერთად ექიმიც იქნება, ასე უფრო დაცულად ვიგრძნობთ თავს“, – ამბობს ჟუჟუნა გოგოლაური.

ახალციხის პირველი სკოლა რამდენიმე თვეა ექიმის შტატზე ვაკანსიას აცხადებს, თუმცა მსურველი არავინაა, მინაძის საკოლაში კი ამბობენ, რომ ექიმის აყვანის საშუალება არ აქვთ.

„მცირეკონტიგენტიანი სკოლა ვართ, ექიმთან ერთად სამედიცინო კაბინეტის მოწყობაც გვჭირდება, მაგრამ ამისთვის ფინანსები არ გვაქვს“, – ამბობს მინაძის სკოლის დირექტორი ლია მაჭარაშვილი.

ახალციხის მუნიციპალიტეტის სოფლებში არსებული 31 სკოლიდან ექიმი მხოლოდ ერთს, აწყურის საჯარო სკოლას ჰყავს. რაც შეეხება ქალაქის შვიდ სკოლას აქ ექიმები მეორე, მესამე და მეექვსე საჯარო სკოლებშია. ახალციხის მეხუთე და ვალის პირველ საჯარო სკოლებში კი ექთნები ჰყავთ.
„რამდენჯერმე დავდე ვაკანსია ექიმის შტატზე, სამწუხაროდ, არავინ შემოვიდა, ამიტომ სკოლას მხოლოდ ექთანი ჰყავს“, – გვითხრა ახალციხის მეხუთე საჯარო სკოლის დირექტორმა ინგა ვარდიძემ.

ექიმის შტატზე ვაკანსიას აცხადებენ ფერსის, ურავლისა და ქალაქ ვალის მეორე საჯარო სკოლებიც, თუმცა ისევე როგორც პირველ და მეხუთე სკოლებში, მსურველები არც ამ შემთხვევებში გამოჩნდნენ.

„ეს რეგიონში ექიმების დეფიციტითაა გამოწვეული“, – ამბობს ახალციხის საგანმანათლებლო რესურსცენტრის უფროსი ხათუნა ხმალაძე.

სკოლას ექიმისა და ექთნის ანაზღაურებისათვის ვაუჩერული დაფინანსების ფარგლებში 395 ლარი ერიცხება. სათანადო ფინანსური და მატერიალური რესურსის არსებობის შემთხვევაში, სკოლებს ექიმისა და ექთნის დაქირავება და მათი შრომის ანაზრაურებაც თავად შეუძლიათ. თუმცა, საკუთარი სახსრებით ვერც ექიმს და ვერც ექთანს მცირეკონტიგენტიანი სკოლები ვერ დაიქირავებენ.

„ექსკურსიებისთვის ალბათ, ან ხელშეკრულებას დავდებთ სოფელში არსებულ ამბულატორიულ ცენტრთან, ან კიდევ სხვა ალტერნატიულ მექანიზმებს გამოვიყენებთ“, – ამბობს მინაძის სკოლის დირექოტი ლია მაჭარაშვილი.

ალტერნატირვა კი მანდატურების, ან მშობლების პირველადი სამედიცინო დამხარების აღმოჩენის მიზნით გადამზადებაა. თუმცა მინაძის სკოლაში არც მანდატურები არაა. ამიტომ ასეთ დროს სკოლამ განათლების სამინისტროს უნდა მიმართოს.

გარდა ექსკურსიებისა სკოლებში მედპერსონასლის მუშაობა რომ აუცილებელია, ამაზე ახალციხის მესამე საჯარო სკოლის ექიმი ლია ნებაძე საუბრობს: „ჩემს ფუნქციებში შედის სკოლაში სანიტარულ მდგომარეობის და ბუფეტში საკვები პროდუქტების ხარისხის კონტროლი, ასევე, ბავშვებისთვის პირველადი დახმარების გაწევა, გათბობის კონტროლი დერეფანსა და კლასებში, წამლებით მომარაგება, მოსწავლეების ფიზიკურ და ფსიქო-მოტორული განვითარების შემოწმება და მეთვალყურეობაა. ყველა ეს იმდენად მნიშვნელოვანი საკითხია, რომ ვფიქრობ მედდა და ექიმი ყველა სკოლაში უნდა იყოს“.

[თორნიკე ზაზაძე, ახალციხე]