შესაძლოა სკოლებში ექთნის შტატი აღდგეს

ამ დრომდე ახალციხის მუნიციპალიტეტის საჯარო სკოლებში სამედიცინო კაბინეტი მხოლოდ სამ სკოლაშია: ახალციხის პირველ, მეხუთე და ვალის ასევე პირველ საჯარო სკოლებში.

აღნიშნულ სკოლებში ექთნის კაბინეტები ამავე სკოლების ხელმძღვანელების თხოვნის შედეგად შემორჩა.

”დიდკონტიგენტიანი სკოლებია, ბევრი შეზღუდული შესაძლებლობების მქონე ბავშვიც სწავლობს, ამიტომ სკოლის ხელმძღვანელობის თხოვნით სამინისტრომ აღნიშნულ სკოლებში ექთნის შტატი აღარ გააუქმა”,- გვიხსნის ახალციხის საგანმანათლებლო რესურსცენტრის უფროსი სპეციალისტი თამარ ებრალიძე.

სკოლებში ექთნის შტატის საჭიროების აუცილებლობაზე საუბრობს ახალციხის მეორე საჯარო სკოლის დირექტორი მარინა ზედგინიძე:
”ბევრი შემთხვევა გვქონია, როცა ექთანი სასწრაფოდ დაგვჭირვებია. ყველაფერზე სასწრაფო დახმარებას ვერ გამოვიძახებთ. მოსწავლეს ან პედაგოგს რამე რომ ასტკივდეს, პირველად დახმარებას კი გავუწევთ, მაგრამ ამას კვალიფიციური მუშაკი უფრო კარგად გააკეთებს”.

სკოლებში ექთნის შტატი საქართველოს განათლებისა და მეცნიერების სამინისტროს გადაწყვეტილებით 2010-2011 სასწავლო წლიდან გაუქმდა.

როგორც ახალციხის რესურსცენტრის უფროსი სპეციალისტი ამბობს, სკოლებში ექთნის შტატი დროებით უნდა გაუქმებულიყო: ”ექთნის შტატი მას შემდეგ აღდგებოდა, როცა განათლებისა და მეცნიერების სამინისტროს დავალებით ჯანდაცვის სამინისტრო იმ სტანდარტებს შეიმუშავებდა, რომლის მიხედვითაც სკოლის ექთნების გადამზადება იგეგმებოდა”.

ჯანდაცვის სამინისტრომ აღებული ვალდებულება არ შეასრულა. შესაბამისად, განათლების სამინისტრომ სკოლებში ექთნის შტატი აღარ აღადგინა.

[მანანა სარაშვილი, ახალციხე]