ახალციხელი გამომგონებლის წარმატება საერთაშორისო ოლიმპიადაზე

მეთორმეტე კლასის მოსწავლემ შალვა გიორგაძემ ნორჩ მეცნიერთა და გამომგონებელთა მეცხრე საერთაშორისო ოლიმპიადაზე, რომელიც სამი დღის განმავლობაში "თბილისი მოლში" იმართებოდა, საქართველოს სახელით საკუთარი გამოგონება წარადგინა. მან ისეთი მოწყობილობა შექმნა, რომელიც ვერტმფრენს და მგზავრებს ავარიულ სიტუაციაში გადაარჩენს.

"მინდა რომ ჩავაბარო საავიაციოზე, კერძოდ ავიაინჟინერიის განხრით, ჩემი გამოგონებაც სწორედ ამას უკავშირდება. ამ სისტემით, რომელიც შევქმენი ავიაკატასტროფის დროს როგორც ვერტმფრენს, ისე მგზავრის სიცოცხლეს გადავარჩენთ", – ამბობს შალვა გიორგაძე.

მისივე თქმით, აღნიშნული მოწყობილობა 2014 წელს საქართველოს ინოვაციებისა და ტექნოლოგიების სააგენტოს მიერ გამართული ღონისძიებისთვის შექმნა: "მას შემდეგ მონაწილეობა კიდევ რამდენიმე კონკურსში და გამოფენაში მივიღე, საიდანაც ყოველთვის გამარჯვებული ვბრუნდებოდი".

ნორჩ მეცნიერთა და გამომგონებელთა მეცხრე საერთაშორისო ოლიმპიადა უკვე მე-9 წელია თბილისში ტარდება.
წლევანდელ ოლიმპიადაში 30 ქვეყნიდან, 280 მოსწავლე და მასწავლებელი მონაწილეობდა.

ოლიმპიადაში 101 პროექტიდან 17 ქართული იყო. ღონისძიებაში მე-7 კლასიდან მე-12 კლასის მოსწავლეები მონაწილეობდნენ.

ოლიმპიადა 6 კატეგორიაში ჩატარდა ფიზიკის, ქიმიის, მათემატიკის, ბიოლოგიის, ინფორმატიკის და საინჟინრო მიმართულებებით. სწორედ ინჟინერიის დარგში მიიღო მონაწილეობა შალვა გიორგაძემ.

მონაწილეებს გამოფენილი ჰქონდათ საკუთარი გამოგონებები, რომელთა დათვალიერება და ტექნიკური შესაძლებლობების გაცნობა ნებისმიერ მოქალაქეს შეეძლო.

შალვა გიორგაძე ახალციხიდან მესამე ახალგაზრდა გამომგონებელია.

შეგახსენებთ, რომ ახალციხეში მცხოვრებმა მეათე კლასის მოსწავლეებმა ირაკლი კაპანაძემ და კარლო ხუციშვილმა მულტიკლიმატიზატორი გამოიგონეს. მოწყობილობა ფერმერებს მიწის ტენიანობის, ტემპერატურისა და მოსალოდნელი ამინდის შესახებ აცნობებს.მეათეკლასელებმა ამ გამოგონებით ათასწლეულის ინოვაციის ეროვნულ კონკურსში 11 თებერვალს პირველი ადგილი დაიკავეს. ახალციხელი გამომგონებლები კონკურსში წარდგენილ ათ გუნდს შორის საუკეთესოები აღმოჩნდნენ.

ისინი, როგორც პირველ ადგილზე გასულები, სამ აპრილს ამერიკის შეერთებულ შტატებში გაემგზავრნენ და კონრადის ფონდის ორგანიზებულ ინოვაციების სამიტში, ნასას კენედის კოსმოსურ ცენტრში გამართულ კონკურსში, მიიღეს მონაწილეობა.

[მანანა სარაშვილი, ახალციხე]