მათემატიკის ოლიმპიადაში რეგიონში პირველ ადგილზე უდის სკოლა გავიდა

მათემატიკის ოლიმპიადა სამცხე–ჯავახეთის სახელმწიფო უნივერსიტეტის ორგანიზებით ჩატარდა. რეგიონის მასშტაბით, ოლიმპიადის პირველ ტურში მონაწილეობა 402–მა მოსწავლემ მიიღო, აქედან მეორე ტურში 101 მოსწავლე გადავიდა, ფინალში კი 43 მოსწავლე დარჩა.

სამცხე–ჯავახეთის მასშტაბით პირველი ადგილი და გარდამავალი თასი მიიღო ადიგენის მუნიციპალიტეტის სოფელ უდის პირველმა სკოლამ, მეორე ადგილზე ახალციხის მესამე საჯარო სკოლის მოსწავლეები გავიდნენ, ხოლო მესამე ადგილი ასპინძის მუნიციპალიტეტის დამალის საჯარო სკოლას ერგო.

რაც შეეხება ახალციხის სკოლებს, აქ პირველ ადგილზე გავიდა და გარდამავალი თასი წელსაც შეინარჩუნა მეექვსე საჯარო სკოლამ, მეორე ადგილი მეხუთე სკოლის მოსწავლეებმა აიღეს, ხოლო მესამე კერძო სკოლა „მზექას“ მოსწავლეებს ერგოთ.

ოლიმპიადაზე ასევე გამოვლინდნენ წარმატებულ მოსწავლეთა მასწავლებლები, სამცხე-ჯავახეთის მუნიციპალიტეტებსა და ქალაქ ახალციხის მასშტაბით, მათ სპეციალური თასები გადაეცათ.

სამცხე–ჯავახეთის უნივერსიტეტი მათემატიკის ოლიმპიადას მეორე წელია ატარებს. მასში მონაწილეობა მეშვიდედან–მეთორმეტე კლასის მოსწავლეებს შეუძლიათ.




[თინათინ ზაზაძე, ახალციხე]