წლის საუკეთესო გამოგონებად ახალციხელი ახალგაზრდების ‘მულტიკლიმატიზატორი’ დასახელდა

საქართველოს საზოგადოებრივმა მაუწყებელმა კონკურსი „წლის საუკეთესო“ წელს პირველად ჩაატარა. როგორც საზოგადოებრივ მაუწყებელში განმარტავენ ტელეკომპანიამ გამოარჩია 2015 წლის ყველაზე მნიშვნელოვანი მოვლენები 12 სხვადასხვა სფეროში, სულ 36 ნომინანტი და მათგან უკვე საზოგადოებამ შეარჩია 12 ყველაზე მნიშვნელოვანი მოვლენა, ადამიანი და ინსტიტუცია. ხმის მიცემა შესაძლებელი იყო ზარებით, სოციალური ქსელით საზოგადოებრივი მაუწყებლის ვებგვერდზე და ასევე, იყო გამოკითხვა. კონკურსზე 30.000–ზე მეტი ხმა შევიდა.

ირაკლი კაპანაძისა და კარლო ხუციშვილის გამოგონებამ გაიმარჯვა ნომინაციაში "წლის ყველაზე მნიშვნელოვანი მოვლენა ახალ ინოვაციებსა და ტექნოლოგიებში".

ირაკლი და კარლო პროექტით "მულტიკლიმატიზატორი" 2014 -15 წლის ათასწლეულის ინოვაციის კონკურსის (Millennium Innovations Award - MIA) გამარჯვებულები არიან. 2015 წლის აპრილში, მათ მონაწილეობა მიიღეს აშშ-ის კონრადის ფონდის ინოვაციების სამიტში, ნასას კენედის კოსმოსურ ცენტრში.

შეგახსენებთ, ახალციხეში მცხოვრებმა მეათე კლასის მოსწავლეებმა ირაკლი კაპანაძემ და კარლო ხუციშვილმა მულტიკლიმატიზატორი გამოიგონეს. მოწყობილობა ფერმერებს მიწის ტენიანობის, ტემპერატურისა და მოსალოდნელი ამინდის შესახებ აცნობებს.

[ნინო ნარიმანიშვილი, ახალციხე]