სასკოლო სპორტული ოლიმპიადის კვირეული ახალციხეში

სასკოლო სპორტული ოლიმპიადა სპორტისა და ახალგაზრდობის სამინისტროს, ასევე განათლებისა და მეცნიერების სამინისტროს ორგანიზებით, საქართველოს ყველა რეგიონულ ცენტრში მიმდინარეობს. სპორტულ ღონისძიებებს ადგილობრივი თვითმმართველობის ორგანოები ატარებენ.

შეჯიბრებები სპორტის ოთხ სახეობაში, მაგიდის ჩოგბურთში, მინი–ფეხბურთში, კალათბურთსა და მძლეოსნობაში ტარდება. ასევე დაგეგმილია მხიარული სტარტები. ოლიმპიადაში ახალციხის ექვსი საჯარო სკოლის მოსწავლეები მონაწილეობენ, სოფლის საჯარო სკოლის მოსწავლეები მძლეოსნობასა და მხიარულ სტარტებში ჩაერთვებიან.

დღეს, 20 აპრილს ახალციხის საჯარო სკოლების მოსწავლეები ერთმანეთს მაგიდის ჩოგბურთში შეეჯიბრნენ. დღესვე დაგეგმილია შეჯიბრი მინი–ფეხბურთშიც. გამარჯვებულებს მედლები და ფასიანი საჩუქრები გადაეცემათ.

„დღეს მიმდინარეობს შეჯიბრი მაგიდის ჩოგბურთში, ერთმანეთს ხვდებიან გოგონები და ბიჭები, ამის შემდეგ გაიმართება შეჯიბრი მინი–ფეხბურთში, ხვალ ფინალში ითამაშებენ კალათბურთელები, როგორც ბიჭები, ასევე გოგონები. 22 აპრილს იქნება მძლეოსნური გარბენი და 23 აპრილს მხიარული სტარტების საფინალო შეხვედრა“, – ამბობს სასკოლო სპორტული ოლიმპიადის პროექტის კოორდინატორი კონსტანტინე ამირეჯიბი.

მისივე თქმით, სპორტის სახეობები ისეა შერჩეული, რომ ოლიმპიადაში ყველა ასაკის ბავშვი ჩაერთოს.

„მაღალ სტანდარტებს არ ვითხოვთ, ამ ოლიმპიადის მთავარი მიზანია, რაც შეიძლება ბევრი ბავშვი იღებდეს მონაწილეობას. მომავლაში პროექტი გაფართოვდება და ყველა მუნიციპალიტეტი ჩაერთვება“, – ამბობს კონსტანტინე ამირეჯიბი.

რეგიონულ ცენტრებში ჩატარებულ შეჯიბრებზე პირველ ადგილზე გასული მოსწავლეები ანაკლიაში გაემგზავრებიან. სადაც საქართველოს მასშტაბით გამარჯვებულებს შეხვდებიან, საბოლოოდ გამარჯვებულები კი გაემგზავრებიან მსოფლიო სასკოლო ოლიმპიადაზე, რომელიც 2016 წელსაა დაგეგმილი.

[თამარ თოთაძე, ახალციხე]