სასკოლო სპორტული ოლიმპიადა ბორჯომში

ბორჯომში სასკოლო სპორტული ოლიმპიადა გუშინ, 22 მარტს დასრულდა. შეჯიბრებების ფარგლებში ფინალური შეხვედრა მინი ფეხბურთში ჩატარდა, სადაც პენალტების სერიაში ჩემპიონობა №6 საჯარო სკოლის გუნდს ხვდა წილად. მეორე ადგილი კი №3 საჯარო სკოლის გუნდმა დაიკავა.

ოლიმპიადის ფარგლებში, 2 თვის განმავლობაში, 13 სკოლის მოსწავლეები სპორტის სხვადასხვა სახეობებში ეჯიბრებოდნენ.

„შეხვედრები გაიმართა მაგიდის ჩოგბურთში, გეზრბენში, მინი ფეხბურთში, კალათბურთსა და ფრენბურთში. შეჯიბრებებში, როგორც გოგონათა ასევე ვაჟთა გუნდები მონაწილეობდნენ. ყველა გუნდს, რომელმაც პირველი ადგილი დაიკავა, შესაძლებლობა ეძლევა იასპარეზოს რეგიონალურ სასკოლო ოლიმპიადაში, რომელიც ახალციხეში გაიმართება“, - ნათქვამია ბორჯომის მუნიციპალიტეტის მიერ გავრცელებულ ინფორმაციაში.

შეხვედრის დასრულების შემდეგ სპორტის სხვადასხვა სახეობაში გამარჯვებულები სხვადასხვა საჩუქრებით დააჯილდოვეს. პირველ, მეორე და მესამე ადგილზე გასულ მონაწილეებს ბორჯომის მუნიციპალიტეტისაგან თასები, მედლები, სიგელები და სპორტული ინვენტარი გადაეცათ.

სპორტული ოლიმპიადა საქართველოს სპორტისა და ახალგაზრდობის საქმეთა სამინისტროს ინიცირებითა და ადგილობრივი ბიუჯეტის დაფინანსებით ჩატარდა. ადგლობრივი ბიუჯეტიდან ღონისძიებისთვის 5665 ლარი გამოიყო.

[sknews.ge]