ახალციხეს ლევან ყიფიანი ესტუმრება

სასკოლო სპორტული ოლიმპიადის კვირეული ახალციხეში 20 აპრილს დაიწყო და 23 აპრილს მხიარული სტარტებით დასრულდება. სპორტის ოთხ სახეობაში მაგიდის ჩოგბურთში, ფრენბურთში, მინი–ფეხბურთსა და მძლეოსნობაში შეჯიბრი უკვე ჩატარდა, ხვალ დაგეგმილია მხიარული სტარტები. პირველ ადგილზე გასული მოსწავლეები ანაკლიაში გაემგზავრებიან.

სასკოლო სპორტული ოლიმპიადის დასკვნით ღონისძიებას ახალციხეში საქართველოს სპორტისა და ახალგაზრდობის მინისტრი ლევან ყიფიანი დაესწრება.

„ხვალ, პირველ საათზე დასკვნითი ღონისძიება გაიმართება ახალციხის სასპორტო სკოლაში, მხიარული სტარტების შემდეგ დავაჯილდოვებთ მთლიანად ოლიმპიადის გამარჯვებულებს დიპლომებით და ანაკლიის საგზურით“, – ამბობს სასკოლო სპორტული ოლიმპიადის პროგრამის კოორდინატორი კონსტანტინე ამირეჯიბი.

[თამარ თოთაძე, ახალციხე]