”ოცნების” აქციისთვის ახალციხეში მოსახლეობას მთელი რეგიონიდან ელოდებიან

”ქართული ოცნების” რიგით მეათე აქცია ახალციხეში 5 საათზე დაიწყება. კოალიციის აქტივისტები რეგიონის ექვსივე მუნიციპალიტეტიდან ახალციხისკენ უკვე გამოემართნენ.

ქალაქში უკვე შემოვიდა კოლონა ადიგენის მუნიციპალიტეტიდან. ქართული ოცნების ადიგენის შტაბის წარმომადგენლების თქმით, მიუხედავად მოსახლეობის დაშინებებისა, აქტიურობა მაინც მაღალია და აქციაზე დასწრების მსურველი საკმაოდ ბევრია.



”ქართული ოცნების” აქტივისტების შეკრება უკვე დაიწყო ახალქალაქის მუნიციპალიტეტშიც,სადაც ამ წუთებში კოალიციის ლიდერი ბიძინა ივანიშვილი მოსახლეობას ხვდება. სწორედ ბიძინა ივანიშვილი ჩაუდგება სათავეში ახალქალაქიდან წამოსულ კოლონას.

დაახლოებით 60 სამარშუტო ტაქსი და 50 მდე მსუბუქი ავტომანქანა დაიძრა ბორჯომიდან ახალციხის მიმართულებით. ”ქართული ოცნების” ბორჯომის შტაბის წევრების განცხადებით კოალიციის აქციას ბორჯომიდან რამდენიმე ასეული ადამიანი დაესწრება.



”ქართული ოცნების” ლიდერის გამოსვლა ახალციხეში ხუთ საათზეა დაგეგმილი. ბიძინა ივანიშვილი თამარ მეფის ძეგლის მიმდებარე ტერიტორიაზე შეკრებილ მოსახლეობასთან კოალიციის სამოქმედო გეგმებზე ისაუბრებს და რეგიონის მოსახლეობას სამცხე-ჯავახეთის მაჟორიტარ კანდიდატებს წარუდგენს.



შეგახსენებთ, რომ კოალიციამ აქცია უკვე გამართა თბილისში, თელავში, რუსთავში, მცხეთაში, გორში, ქუთაისში, ოზურგეთში ბათუმსა და ამბროლაურში.





[თამარ თოთაძე, ახალციხე]