ახალქალაქში “ქართული ოცნების” ოფისი გაიხსნა

ოფისის გახსნას ადგილობრივი მოსახლეობიდან 15-მდე ადამიანი ესწრებოდა. დაახლოებით ამდენივე, ქართული ოცნების მაისურებში გამოწყობილი, ახალგაზრდა კოალიციის ხელმძღვანელებთან ერთად თბილისიდან ჩამოვიდა.

ოფისის გახსნაზე სიტყვით კოალიციის ხელმძღვანელები და აქტივისტები გამოვიდნენ, მათ შორის: გია ვოლსკი, იური მეჩითოვი, გიორგი ჟვანია. ისაუბრეს ადგილობრივი საზოგადოებრივი ორგანიზაციების ხელმძღვანელებმაც: ნორიკ კარაპეტიანმა და აზატ შიბაქციანმა. გამომსვლელებს შორის იყო სოზარ სუბარიც, რომელიც მედიატორის როლს ასრულებდა.

გია ვოლსკი შეკრებილებს კოალიცია “ქართული ოცნების” შექმნის საფუძვლებზე ესაუბრა და მათ კოალიციის პრიორიტეტები წარუდგინა. მან იმედი გამოთქვა, რომ ამომრჩევლების მხარდაჭერას ახალქალაქშიც მოიპოვებენ.

პრიორიტეტებს შორის გია ვოლსკიმ დემოკრატიული არჩევნები, სოფლის მეურნეობის ხელშეწყობა, ხელმისაწვდომი სამედიცინო დაზღვევა, მცირე და საშუალო ბიზნესის მხარდაჭერა, სიღარიბესთან ბრძოლა და ხელმისაწვდომი განათლება დაასახელა.

ფოტოგრაფმა იური მეჩითოვმა კოალიციისადმი თავისი ლოიალობა გამოხატა და ყველას, ვისაც დღევანდელი რეალობის შეცვლა სურს, “ქართული ოცნების” მხარდაჭერისკენ მოუწოდა.

კოალიციის ახალქალაქის შტაბის ხელმძღვანელი გიორგი ჟვანიაა. მისი თქმით, ეს პოსტი ახალქალაქის მუნიციპალიტეტიდან საქართველოს პარლამენტის ყოფილ დეპუტატს მელიქ რაისიანს უნდა ეკავოს. ჟვანიამ განაცხადა, რომ მელიქ რაისიანი ოფისის გახსნაზე დასწრებას და თავისი ადგილის დაკავებას ვერ ახერხებს, რადგან იგი საქართველოში ვერ ჩამოდის. ამის მიზეზი რაისიანის წინააღმდეგ აღძრული სისხლის სამართლის საქმეა.

ჟვანიას განცხადებით, “თბილისში და ქუთაისში დაწყებული აქციების ტალღა მთელ ქვეყანას მოივლის და ახალქალაქამდეც მიაღწევს”. სწორედ ამ დროს ჩამოვა ახალქალაქში კოალიციის ლიდერი ბიძინა ივანიშვილი.

[აღუნიკ აივაზიანი, ახალქალაქი]