”ოცნების” ადგილობრივი შტაბები ახალციხის აქციისთვის ემზადებიან

როგორც კოალიციის ახალციხის შტაბში აცხადებენ, აქცია თამარ მეფის ძეგლის მიმდებარე ტერიტორიაზე, კოსტავასა და ზაქარია დიდიმამიშვილის ქუჩების შეერთების ადგილას გაიმართება. ამ ადგილას ჯერ მოსამზადებელი სამუშაოები არ მიმდინარეობს. სცენის მონტაჟი, სავარაუდოდ,შაბათს დილით დაიწყება.

”ოცნების” ახალციხის შტაბში აცხადებენ, რომ ადგილობრივი თვითმმართველობისგან ფართის გამოყოფასთან დაკავშირებით არანაირი პრობლემა არ შექმნიათ.

”უპრობლემოდ გამოგვიყეს ის ადგილი, რომელიც მოვითხოვეთ”, - ამბობს ”ქართული ოცნების” ახალციხის შტაბის ხელმძღვანელი ელვარდ ზაზაძე.

მისივე განმარტებით, უსაფრთხოების დაცვის მიზნით კოალიციამ უკვე მიმართა საპატრულო პოლიციისა და სასწრაფო დახმარების სამსახურებსაც: ”დაგვპირდნენ, რომ მოძრაობა რომ არ შეფერხდეს, მიირებენ გარკვეულ ზომებს. გარდა ამისა, გამგებელი დაგვპირდა, რომ ამ დღეს შეჩერდება სამშენებლო სამუშაოები ყოფილი პოლიკლინიკის მიმდებარე ტერიტორიაზე”.

აქციის ორგანიზებაში რეგიონულ შტაბებს თბილისიდან ჩამოსული კოალიციის ახალგაზრდული ფრთაც ეხმარება. ჯგუფი ქალაქში გუშინ საღამოს ჩამოვიდა.

პოლიტიკური კოალიციის ახალციხის შტაბში დამსწრეთა მოსალოდნელი რაოდენობის შესახებ პროგნოზის გაკეთება უჭირთ.

”იმ შემთხვევაში თუ აქციის დღეს ქალაქში ტრანსპორტის მოძრაობას არ შეზღუდავენ, ბენზინგასამართ სადგურებს არ გააჩერებენ და არ დაიწყებენ მოსახლოების დაშინებას, მხოლოდ ახალციხის მუნიციპალიტეტიდან აქციაზე 7000-დან 10 000-მდე ადამიანი მოვა. მოსახლეობა განწყობილია ამისთვის. ამას ცხადია დაემატებიან სხვა მუნიციპალიტეტიდან ჩამოსული ხალხიც. თუ, კიდევ ვიმეორებ, არ იქნება დაშინება და შეფერხებები. იქაური შტაბებიც ემზადებიან აქციისთვის”, - აცხადებს ელვარდ ზაზაძე.

”ქართული ოცნების” აქცია შაბათს, 17:00 საათზე დაიწყება. აქციამდე იმავე ტერიტორიაზე, ტრადიციისამებრ, ბერას კონცერტი გაიმართება.

ბოლო აქცია კოალიციამ 9 სეტქემბერს, თელავში გამართა. სწორედ მაშინ დაანონსა, ახალციხის აქცია. მომდევნო აქცია 22 სექტემბერს, ზუგდიდშია დაგემილი.

[ნინო ნარიმანიშვილი, ახალციხე]