”ოცნების” სამზადისი აქციისთვის

თამარ მეფის ძეგლის მიმდებარე ტერიტორიაზე მოძრაობა შეზღუდულია. სცენის მონტაჟი, რომელიც ბრონილებული მინითაა გარშემოვლებული, თითქმის დასრულებულია. სრულდება ხმის გამაძლიერებლების მოწყობაც.

ხალხმრავლობაა ”ქართული ოცნების” ახალციხის შტაბშიც. აქ უკვე კოალიციის ცენტრალური ოფისის წარმოამდგენლები ადგილობრივებთან ერთად საორგანიზაციო საკითხებზე მუშაობენ.

”ვმუშაობთ მუნიციპალიტეტის სოფლებიდან აქციაზე წამოსვლის მსურველთა მობილიზებასა და მათ ტრანსპორტირებაზე. იმ სოფლებში, სადაც საკუთარი ტრანსპორტი არ ჰყოფნით ახალციხემდე ჩამოსასვლელად, ვგზავნით მინი ავტობუსებს”, - გვიხსნის ოლეგ სანდროშვილი და ამატებს, რომ აქციაზე წამოსვლის მსურველები მუნიციპალიტეტის თითქმის ყველა სოფლიდან არიან.

აქციაზე წამოსასვლელად სამზადისია რეგიონის მასშტაბით ექვსივე მუნიციპალიტეტში.

”ნინოწმინდაში შტაბი არ გვაქვს, მაგრამ გვყავს მხარდამჭერები და ისინიც დღეს შემოუერთდებიან აქციას ახლაციხეში”, - აცხადებს კოალიცია ”ქართული ოცნების” შეხვედრების სამსახურის წარმომადგენელი მაგდა ოძელაშვილი

კოალიცია ”ქართული ოცნების” ლიდერი ბიძინა ივანიშვილი მოსახლეობასთან შეხვედრას ჯერ ახლაქალაქში გამართავს და ახალციხეში ამის შემდეგ გამოემართება. ივანიშვილი მოსახლეობას ახალციხეში 17:00 საათზე მიმართავს. ამის შემდეგ კი, სავარაოდოდ, ღონისძიება ”შინის” კონცერტით დასრულდება.

”ჯერ-ჯერობით ყველა მიმართულებით მშვიდობაა. თუმცა როგორც ვიცით ბოგა-სვირის მიმართულებით სპეც დანიშნულების რაზმი მოძრაობს. არც არაფერს ეტყვიან ალბათ ხალხს, ეს ფსიქოლოგიური მომენტია, მხოლოდ იქ იმოძრავებენ”, - ამბობს კოალიცია ”ქართული ოცნების” საორგანიზაციო საკითხების წარმომადგენელი თეიმურაზ მამიაშვილი.

[თამუნა უჩიძე, ახალციხე]