აწყურში დაკავებულებთან საპროცესო გარიგება გაფორმდა

პროკურატურასთან გაფორმებული საპროცესო ახალციხის რაიონულ სასამართლოში მოსამართლე გოჩა ჯეირანაშვილმა 16 აპრილს დაამტკიცა. ამ დღეს, ბრალდებულების საქმეზე წინა სასამართლო სხდომა უნდა გამართულიყო. თუმცა, რადგან უკვე პროკურატურასთან გაფორმებული საპროცესო გარიგება არსებობდა, მოსამართლეს მისი დამტკიცება მოუხდა.

ხუთი ბრალდებულიდან სამი თამაზ გაჩეჩილაძე, ნუგზარ გაჩეჩილაძე და ავთანდილ გაჩეჩილაძე სასამართლო დარბაზიდან გაათავისუფლეს. ორმა, სიმონ აბულაძემ და გიორგი სააკიანმა კი სასჯელაღსრულების დაწესებულება მანამდე დატოვეს, რადგან მათ აღკვეთის ღონისძიებად შეფარდებული ჰქონდათ გირაო პატიმრობის უზრუნველყოფით.

გაჩეჩილაძეებს ბრალდების მხარე სსკ–ის 353–ე მუხლის პირველი ნაწილითა და 187–ე მუხლის პირველი ნაწილით გათვალისწინებული დანაშაულის ჩადენაში ედავებოდა. 187–ე სხვისი ნივთის დაზიანებას გულისხმობს, 353–ე კი პოლიცილის ან სხვა ორგანოს წარმომადგენლის მიმართ თავდასხმას. ეს მძიმე კატეგორიის დანაშაულს განეკუთვნება და თავისუფლების აღკვეთას ოთხიდან შვიდ წლამდე ითვალისწინებს.
სააკიანსა და აბულაძეს ბრალს მხოლოდ 353–ე მუხლით სდებენ. მათ საპროცესო შეთანხმების თანახმად ოთხი წელი პირობითი მსჯავრი და 3 000 ლარი ჯარიმა დაეკისრათ.

გაჩეჩილაძეები კი ხუთწლიანი პირობითი მსჯავრისა და 3 000–ლარიანი ჯარიმის სანაცვლოდ გაათავისუფლეს.

„მათ ჯარიმა უკვე გადაიხადეს“, – აცხადებს აწურლების ადვოკატი ნოდარ აკოფაშვილი.

შეგახსენებთ, რომ აწყურში ხუთი ადგილობრივი სამცხე–ჯავახეთის სამხარეო მთავარი სამმართველოს თანამშრომლებმა 20 თებერვალს დააკავეს. მანამდე კი 4 თებერვალს, აწყურში ადგილობრივები და გარემოსდაცვითი ზედამხედველობის სამსახურის წარმომადგენლები ერთმანეთს დაუპირისპირდნენ. ამავე დღეს აწყურლებმა ახალციხის რაიონულ სამმართველოსთან აქცია გამართეს და გარემოსდაცვითი ზედამხედველობის სამსახურის თანამშრომლები ზეწოლაში დაადანაშაულეს.

[თამუნა უჩიძე, ახალციხე]