აწყურში 5 ადგილობრივი დააკავეს

აწყურელების აქცია სამმართველოს შენობასთან. 4 თებერვალი, 2015წ.

5-ვე ადგილობროვი, თ.გ, ნ.გ, ს.მ., გ.ს. და ა.გ, სამცხე-ჯავახეთის სამხარეო მთავარი სამმართველოს ახალციხის რაიონული სამმართველოს თანამშრომლებმა, საკუთარ სახლებში დააკავა. დაკავებულებს ბრალი დღეს, 21 თებერვალს, დაახლოებით ნახევარი საათის წინ, 20:00 საათზე წარუდგინეს.

შინაგან საქმეთა სამინისტროს ინფორმაციით, 5-ვე მათგანი სამართალდამცველებმა სისხლის სამართლის კოდექსის 353-ე მუხლით დააკავეს.
საქმე ეხება მიმდინარე წლის 4 თებერვალს, აწყურში, ადგილობრივებსა და გარემოსდაცვითი ზედამხედველობის დეპარტამენტის თანამშრომლებს შორის მომხდარ ინციდენტს.

შეგახსენებთ, გარემოსდაცვითი ზედამხედველობის დეპარტამენტის თანამშრომლებმა 4 თებერვალს ახალციხის მუნიციპალიტეტის სოფელ აწყურში უკანონოდ მოჭრილი 49 ხის მორი ნახეს. როცა დეპარტამენტის თანამშრომლებმა ნანახი მასალის აზომვა, ტერიტორიის დადგენა და სახეობის იდენტიფიცირება დაიწყეს, იქ ადგილობრივები შეგროვდნენ. მალევე ვითარება დაიძაბა, შეხლა-შემოხლისას დაზიანდა გარემოსდაცვითი ზედამხედველობის დეპარტამენტის კუთვნილი ავტომანქანა.

სამართალდამცველებმა, რომლებიც ადგილზე გარემოსდამცველებმა გამოიძახეს, ერთ-ერთი ადგილობრივი დააკავეს. ამის შემდეგ, აწყურის მცხოვრებთა ნაწილმა აწყურში თბილისი-ახალციხის ცენტრალური მაგისტრალის აწყურის მონაკვეთი გადაკეტა, ნაწილი კი ახალციხეში წამოვიდა და სამმართველოს შენობასთან რამდენიმე საათის განმავლობაში მართავდა აქციას. აქცია მას შემდეგ დასრულდა, რაც დაკავებული გაათავისუფლეს. მაშინ შსს-ში განმარტეს, რომ ნ.გ. ალკოჰოლის ზემოქმედების ქვეშ იყო და არ დაუკითხავთ.

5 დაკავებულიდან 2-ს ადვოკატი ირაკლი ბარძიმაძე იცავს. ბარძიმაძე აცხადებს, რომ 5-ვე სასამართლოს განჩინებით დააკავეს, რისი აუცილებლობაც არ იყო: „სახლებში იჯდნენ, სასამართლო განჩინება საერთოდ არ იყო საჭირო“.

ბარძიმაძის დაცვის ქვეშ მყოფები თავს უდანაშაულოდ მიიჩნევენ. ბარძიმაძის ინფორმაციით, დანაშაულს არც დანარჩენი სამი დაკავებული აღიარებს.
5 დაკავებულიდან 4 ახალციხის დროებითი მოთავსბის იზოლატორშია მოთავსებული, ერთი კი ბორჯომის.

[ნინო ნარიმანიშვილი, ახალციხე]