რაიონული სამმართველოს შენობასთან აწყურელები აქციას მართავენ

აწყურელები გარემოსდაცვითი ზედამხედველობის სამსახურის წარმომადგენლების მიერ მოსახლეობის ხშირ კონტროლსა და მოჭრილი შეშის გამო დაჯარიმებას აპროტესტებენ.

აქციის პარალელურად, ამ წუთებში ახალციხის რაიონულ სამმართველოში აწყურში მცხოვრებ ნუგზარ გაჩეჩილაძეს ჰკითხავენ. გაჩეჩილაძე დღეს გარემოსდაცვითი ზედამხედველობის სამსახურის წარმომადგენლებისა და აწყურელებს შორის მომხდარი შელაპარაკებისას დააკავეს.

დღეს, 4 თებერვალს, აწყურში დაპირისპირება გარემოსდაცვითი ზედამხედველობის სამსახურის წარმომადგენლების გამოჩენას მოჰყვა. როგორც სამმართველოსთან შეკრებილები ამბობენ, ზედამხედველობის სამსახურის წარმომადგენლები თითქმის ყოველ დღე, ჩხრეკის ორდერის გარეშე, შედიან მათ ეზოებში და თუ რაიმე ხე მასალას აღმოაჩენენ, ხალხს აჯარიმებენ. მათივე თქმით, ჯარიმდებიან იმ შემთხვევაშიც, თუ საშეშე ან სამასალე მერქანი კანონიერად, ბილეთით აქვთ ტყიდან გამოტანილი.

აქციის ერთ-ერთი მონაწილე „სამხრეთის კარიბჭესთან“ საუბარში ამბობს, რომ დღეს ზედამხედველობის სამსახურის წარმომადგენლებმა აწყურში, გაჩეჩილაძის ეზოში მოჭრილი ხე ნახეს. ამის შემდეგ, მათსა და ნუგზარ გაჩეჩილაძეს შორის სიტყვიერი დაპირისპირება დაიწყო. ადგილობრივების თქმით, გარმოსდამცველმა ნუგზარ გაჩეჩილაძეს მოსთხოვა დაედასტურებინა რომ ხე მისი იყო, რასაც გაჩეჩილაძე უარყოფდა. კამათი ფიზიკურ დაპირისპირებაში გადაიზარდა. ჩხუბში თანასოფლელებიც ჩაერთვნენ და შეხლა- შემოხლისას დაზიანდა გარემოსდამცველების მანქანა.

„ამ დროს ადგილზე მოვიდა საპატრულო პოლიცია და ნუგზარ გაჩეჩილაძე პოლიციაში წამოიყვანეს“, - გვიამბობს აქციის მონაწილე.

გაჩეჩილაძის წამოყვანისთანავე, ახალციხეში წამოვიდა აწყურში მცხოვრები 30-მდე ადამიანი. ყველა მათგანი უკვე 2 საათია სამმართველოს შონობასთან დგას. პარალელურად, სოფელში გადაკეტეს ახალციხე - თბილისის ცენტრალური მაგისტრალის აწყურის მონაკვეთი.

როგორც ადგილობრივი ნანა გუჯიშვილი „სამხრეთის კარიბჭესთან“ სატელოფონო საუბარში ამბობს, ამ დრომდე გზა გადაკეტილი აქვს 40-მდე ადამიანს.

აწყურლების მოთხოვნაა პოლიციაში მყოფი ნუგზარ გაჩეჩილაძე უპირობოდ გაათავისუფლონ, არ დააკისრონ არანაირი ჯარიმა, გარემოსდამცველებმა კი ადგილობრივების ტერორი შეწყვიტონ.

„სოფელში უკანონოდ არაფერი ხდება, ბილეთის გარეშე შეშას ვერავინ გამოიტანს. მიუხედავად ამისა, სოფელში თითქმის ყოველ დღე ადგილობრიოვები გასათბობად მოტამნილი შეშის გამო დატერორებული ყავთ“, - გვეუბნება ადგილობრივი ალექსანდრე მარტინენკო.

შეკრებილები ამბობენ, რომ არ დაიშლებიან ვიდრე არ გამოუშვებენ გაჩეჩილაძეს.









[თამუნა უჩიძე, ნინო ნარიმანიშვილი, ახალციხე]