ახალქალაქის ბაზრის დირექტორი და კონტროლიორი პატიმრობიდან გაათავისუფლეს

საპროცესო შეთანხმების მიხედვით, ახალქალაქის ბაზრის დირექტორს არარატ საჰარიანს და კონტროლიორ მერუჟან ოგანესიანს 2000–2000 ლარიანი ჯარიმა, ასევე პირობითი მსჯავრი შეეფარდათ. მსჯავრდებულები მოსამართლემ სააპელაციო სასამართლოს დარბაზიდან გაათავისუფლა.

„საქმე იყო ძალიან სუსტი. მაგათთვის არც ოთხი წელი არ უნდა მიეცათ და უნდა გაეშვათ სახლში. საკმარისი მტკიცებულებები არ არსებობდა ბრალდებულების წინააღმდეგ, ამიტომ პროკურატურას თავიდანვე უარი უნდა ეთქვა ბრალზე. მიხვდნენ რომ გავამართებდით და ამიტომ შემოგვთავაზეს საპროცესო“, – ამბობს მსჯავრდებულების ადვოკატი ვაჟა ლონდარიძე.

მისივე თქმით, ოგანესიანს პირობითი მსჯავრი ერთი თვით, საჰარიანს კი ერთ წელი შეეფარდა.

შეგახსენებთ, რომ ფინანსთა სამინისტროს საგამოძიებო სამსახურმა შპს „ახალქალაქის აგრარული ბაზრის“ დირექტორი 21 მაისს დააკავა. საქმის მასალების მიხედვით, საჰარიანი უფროს კონტროლიორთან ერთად მოქმედებდა. პროკურატურის მტკიცებით ბაზრის დირექტორმა მოიჯარე პირს 1000 ლარი გამოართვა, ამავე ბრალდებით ოგანესიანიც დააკავეს. ორივე მათგანს ბრალი სისხლის სამართლის კოდექსის 221–ე მუხლის მეორე ნაწილის ა ქვეპუნქტით ედებოდათ, რაც ჯგუფურად კომერციულ მოსყიდვას გულისხმობს.

[მარიამ ბარძიმაძე, ახალქალაქი]