'უთხარი არა დისკრიმინაციას'- ახალგაზრდული პროგრამა ახალციხეში

ექვსი ქვეყნის ხუთ-ხუთი ახალგაზრდა ახალციხეში ერთი კვირის განმავლობაში დარჩება. ამ დროის განმავლობაში რამდენიმე შეხვედრაა დაგეგმილი. ახალგაზრდები ისაუბრებენ თუ რა მდგომარეობაა მათ ქვეყანაში დისკრიმინაციის კუთხით და როგორ შეიძლება ამ პრობლემის გადაჭრა.

„სხვადასხვა ქვეყნის მოქალაქეებს, ძირითადად სტუდენტებს, საშუალება აქვთ გაეცნონ ამ ქვეყნების კულტურას. ამავდროულად პროექტები არის კონკურეტულ თემებზე, გვაქვს გარკვეული აქტივობები, რაც თითოეულ მონაწილეს საშუალებას აძლევს, დისკრიმინირებული ადამიანების ადგილას წარმოიდგინოს თავი“, - ამბობს არასამთავრობო ორგანიზაცია "ეკონომიკის მაგისტრთა კლუბის" ახალგაზრდების სამოქალაქო განათლების დეპარტამენტის უფროსი ჯონი სამხარაძე.

მისივე განმარტებით, ახალციხე, მასპინძელ ქალაქად, შემთხვევით არ შერჩეულა: „ახალციხეში ცხოვრობს, როგორც ქართველი, ასევე სომეხი, ებრაელი, რუსი ეროვნების მოსახლეობა. გვინდოდა ჩამოსული ახალგაზრდებისთვის გვეჩვენებინა, რომ საქართველოში არსებობს ქალაქი, სადაც თანაცხოვრობენ სხვადასხვა ეროვნების და აღმსარებლობის ადამიანები. ეს ნიშნავს, რომ არ აქვს მნიშვნელობა რომელი აღმსარებლობის ადამიანი ხარ, რა ეროვნება გაქვს, ყოველთვის შეგვიძლია შევქმნათ ისეთი საზოგადოება, სადაც ყველას უფლება დაცული იქნება“.

აღნიშნული პროგრამის ფარგლებში ახალგაზრდები დღეს, 16 აპრილს კერძო სკოლა „მზექას“ მოსწავლეებს შეხვდნენ. შემდეგ კი მეხუთე საჯარო სკოლაში გადაინაცვლეს.

„ჩვენი მიზანია, რომ ქართველ ახალგაზრდებს სხვადასხვა ქვეყნების ახალგაზრდებთან ჰქონდეთ ურთიერთობა. ასევე საშუალება გვაქვს, რომ 18-დან 25 წლამდე ახალგაზრდები ამ პროექტის ფარგლებში წავიყვანოთ სხვადასხვა ქვეყნებში“, - ამბობს იგი.

ახალგაზრდული გაცვლითი პროგრამა ევროკავშირის მიერაა დაფინანსებული.

[თამარ თოთაძე, ახალციხე]