სოფელ წახანში ხიდის შეკეთებას ითხოვენ

ნუგზარ კარკაძე, გამგებლის წარმომადგენელი წახანში

ადიგენის მუნიციპალიტეტის სოფელ წახანში სოფელ ქიქინეთთან დამაკავშირებელი საავტომობილო ხიდი მეხუთე დღეა დაზიანებულია. 30 წლის წინ აშენებული ხიდი პერიოდულად მწყობრიდან გამოდის და შეკეთებას საჭიროებს.

სოფელ წახანში გამგებლის წარმომადგენელის ნუგზარ კარკაძის თქმით, ადგილობრივებმა ხიდი დროებით შეაკეთეს და ახლა მის უკეთ გარემონტებას გამგეობას სთხოვენ: „ეს საკითხი დავაყენე უკვე გამგეობაში”.

მისი თქმით, ხიდს რემონტი ხუთი–ექვსი წლის წინ ჩაუტარდა, თუმცა ისევ დაზიანდა: „ფიცარია ჩატეხილი. დროებით გავაკეთეთ და ახლა მისით სარგებლობა შესაძლებელია“.

გამოყოფს თუ არა ადიგენის მუნიციპალიტეტის გამგეობა თანხას ხიდის შესაკეთებლად, თვითმმართველობაში ჯერ არ იციან.

„ვიდრე არ გავიგებთ ხიდის დაზიანების ხარისხს, ვერაფერს გეტყვით. გამგეობის შესაბამისი სამსახურის წარმომადგენლები გავლენ ადგილზე, შეისწავლიან ვითარებას და ამის შემდეგ გვეცოდინება, რას როგორ გავაკეთებთ“, – ამბობს ადიგენის მუნიციპალიტეტის გამგებელი ზაქარია ენდელაძე.

[თამუნა უჩიძე, ახალციხე]