ზარზმელის ქუჩაზე ასფალტს აგებენ

ე.წ. ადინაცატების დასახლებაში ასფალტის დაგება უკვე დაიწყეს. დღეს, 25 მარტს მიმდინარე სამუშაოები სამცხე–ჯავახეთის გუბერნატორმა აკაკი მაჭუტაძემ, მისმა მოადგილემ ავთანდილ კაჭკაჭაშვილმა, ახალციხის მერმა გიორგი კოპაძემ და მერიის წარმომადგენლებმა მოინახულეს.

ამ ეტაპზე ასფალტი ზარზმელის ქუჩის 51–ე კორპუსთან მისასვლელ გზაზე იგება.

"მიმდინარეობს ასფალტის დაგება, პირველი შრე იქნება ხუთ სანტიმეტრიანი, მეორე შრე სამ სანტიმეტრიანი და ამ გზით ისარგებლებს 1 600 მოსახლე. ასევე, იგეგმება გამწვანების ზოლის მოწყობა, მოგვიანებით კი გარე განათების დამონტაჟება", – ამბობს სამცხე–ჯავახეთის გუბერნატორი აკაკი მაჭუტაძე.


ადგილობრივების თქმით, ბოლო 20 წლის განმავლობაში ამ დასახლებაში ასფალტი არ დაგებულა.

"20 წელია აქ ვცხოვრობთ და არაფერი არ გაკეთებულა. მაგრამ დღეს ხალხი კმაყოფილია. დასუფთავდა ქუჩა, ნაგავი გაიზიდა და ასფალტი იგება", – ამბობს ზარზმელის ქუჩაზე მცხოვრები ტარიელ ასპანიძე.

შეგახსენებთ, რომ ამ ქუჩაზე, მცხოვრებლებს დასახლებაში დასაგები გზის სიგანე არ მოსწონდათ. ადგილობრივებმა ხელმოწერები შეაგროვეს და მერიაში განცხადება შეიტანეს, რომლითაც, გზის გაფართოებას ითხოვდნენ. საბოლოოდ ზარზმელის 51–ში მცხოვრები მოსახლეობა და ქალაქის მერია შეთანხმდა, რა ტიპის ცვლილება შევიდოდა პროექტში, რის შემდეგაც, გზის სავალი ნაწილი შედარებით გაფართოვდა.

"პროექტში იყო ხარვეზი, რომელიც გამოსწორდა და ჩვეულებრივი სამანქანო გზა გაკეთდა, სადაც ორი მანქანა ერთმანეთს გვერდს აუქცევს. ასეთი ხარვეზები ხდება ხოლმე პროექტებში, მაგრამ ამის ცვლილება არ არის ძნელი. ავტორთან შეთანხმებით შევიტანეთ ცვლილება და იმ სამუშაოების ხარჯზე რა თანხაც დაიზოგა სხვა სამუშაოებისთვის გაიხარჯა, მაგალითად გაკეთდა კორპუსებში შესასვლელი კიბე", – ამბობს ქალაქ ახალციხის მერი გიორგი კოპაძე.

ზარზმელის ქუჩის რეაბილიტაცია რეგიონებში განსახორციელებელი პროექტების ფონდიდან ფინანსდება, სამუშაოების შესასრულებლად 585.094 ლარი იხარჯება. სამუშაოები 2015 წლის მაისში უნდა დასრულდეს. სამუშაოებს შპს "ასტორია" ასრულებს.

[თამარ თოთაძე, ახალციხე]