ზარზმელის მცხოვრებლებმა და მერიამ შეთანხმებას მიაღწიეს

დღეს, 26 თებერვალს, ახალციხეში, ზარზმელის ქუჩის N51–ში მცხოვრებლებთან, რომლებმაც გუშინ მერიაში გზის გაფართოების მოთხოვნით განცხადება და ხელმოწერები შეიტანეს, ახალციხის მერიის წარმომადგენლები მივიდნენ.

ახალციხის მერის მოადგილემ ზაზა გელაძემ და ურბანული მოწყობისა და საქალაქო მეურნეობის სამსახურის უფროსმა გელვასი გელაძემ ადგილობრივებს აუხსნეს, რომ ასფალტის საფარის გასაგანიერებლად, პროექტისთვის გამოყოფილი თანხა საკმარისი არ არის, დამატების საშუალება კი ბიუჯეტს არ აქვს. ერთადერთი გამოსავალია, ბორდიურების დავიწროების ხარჯზე, ასფალტის საფარმა ფარეხებიდან კორპუსისკენ აიწიოს. ასე გზა გაფართოვდება, თუმცა, არა ასფალტის საფარის დამატების ხარჯზე. ის ნაწილი, რაც ფარეხებისკენ დარჩება, ასფალტის გარეშე იქნება.

ადგილობრივები ამბობენ, რომ მერიის წინადადებას დასთანხმდნენ. შეთანხმება მიღწეულია, მშენებლები სამუშაოებს ისევ გააგრძელებენ.

შეგახსენებთ, რომ ახალციხეში, ზარზმელის ქუჩაზე მცხოვრებლებს დასახლებაში დასაგები გზის სიგანე არ მოსწონდათ. მათ 23 თებერვალს ახალციხის მერთან შეხვედრა ითხოვეს. მერის მოადგილე ზაზა თამარაშვილი, რომელიც შეკრებილებთან მივიდა, ადგილობრივებს დაჰპირდა, რომ მშენებელ კომპანიას დაელაპაარაკებოდა. მეორე დღეს, 24 თებერვალს, დილით, მუშებს წინა დღეს მოწყობილი ბორდიურები მონგრეული დახვდათ და ქუჩაზე სამუშაოები დროებით შეწყვიტეს. იმავე დღეს, საღამოს, ადგილობრივებმა ხელმოწერების შეგროვება დაიწყეს. გუშინ, 25 თებერვალს, მათ მერიაში განცხადება შეიტანეს, რომლითაც, გზის გაფართოებას ითხოვდნენ.

შეგახსენებთ, ზარზმელის ქუჩის რეაბილიტაცია რეგიონებში განსახორციელებელი პროექტების ფონდიდან ფინანსდება, სამუშაოების შესასრულებლად 585.094 ლარი იხარჯება. სამუშაოები 2015 წლის მაისში უნდა დასრულდეს.

[მანანა სარაშვილი, ახალციხე]