ზარზმელის ქუჩაზე ასფალტის დაგება დასრულდა

ახალციხეში, ზარზმელის ქუჩის მოსახლეობას დღეს, 11 ივნისს ქალაქ ახალციხის მერი გიორგი კოპაძე და ზარზმელის ქუჩის მაჟორიტარი დეპუტატი, ახალციხის მუნიცპალიტეტის საკრებულოს თავმჯდომარის მოადგილე თამარ გოგოლაძე ესტუმრნენ. მუნიციპალიტეტის პირველმა პირებმა ამ დასახლებაში უკვე დასრულებული ინფრასტრუქტურული სამუშაოები მოინახულეს.

"ამ უბანში ამოსვლა შეუძლებელი იყო, ყველაზე მაღალმთიან სოფელზე უარესი მდგომარება იყო. მოსახლეობა კმაყოფილია, მაგრამ ბუნებრივია მათ აქვთ სხვა პრობლემებიც, მოვედით ამის მოსასმენად და ვფიქრობთ რა შეიძლება გაკეთდეს. თუმცა ყველაფერი ერთდროულად ვერ გაკეთდება", – ამბობს თამარ გოგოლაძე.

მისივე თქმით, ამ დასახლებაში, მას შემდეგ რაც ასფალტი დაიგო დასუფთავების სამსახურმაც დაიწყო მუშაობა. ასევე იგეგმება ნაგვის ურნების დადგმაც. გზის რეაბილიტაციასთან ერთად, ზარზმელის ქუჩაზე გაკეთდა საბავშვო მოედანიც.

გიორგი კოპაძის თქმით, ამ დასახლებაში გარე განათებაც დამონტაჟდება. როგორც ქალაქის მერი ამბობს, აღნიშნული პროექტი უკვე შესყიდულია, თუმცა კონკრეტულად რა თანხა დაიხარჯება გარე–განათების სისტემის დასამონტაჟებლად, გიორგი კოპაძე ვერ გვეუბნება.

"გაკეთდება ეკონომიური განათების სისტემა, იქნება ლედ–ნათურები და ერთი ხელიდან მართული პულტი. ასევე იგეგმება ფასადების რემონტიც, ინფრასტრუქტურის სამსახური უკვე მუშაობს თუ რა დაჯდება ეს პროექტი", – ამბობს გიორგი კოპაძე.

ქალაქის მერთან და მაჟორიტარ დეპუტატთან შეხვედრისას ადგილობრივებმა სხვა პრობლემებზეც ისაუბრეს. მათი თქმით, დასახლება ქალაქის ცენტრიდან საკმაოდ შორს არის, ამიტომ კარგი იქნება თუ ზარზმელის ქუჩაზე საქალაქო ტრანსპორტი დაინიშნება.

"ძალიან კარგი საქმე გაკეთდა, რომ გამოხვალ გესიამოვნება, სუფთა და მოწესრიგებულია გზა. კარგი იქნებოდა ტრანსპორტიც რომ დადიოდეს", – ამბობს ზარზმელის ქუჩაზე მცხოვრები მერი ზედგინიძე.

გიორგი კოპაძის თქმით, მერია ამ პრობლემის მოგვარებაზეც იმუშავებს.

"იმ კომპანიასთან, რომელიც ქალაქს ემსახურება დავიწყებთ მოლაპარაკებებს, გზა უკვე კარგია და თავისუფლად შეძლებს ტრანსპორტი ამოსვლას", – ამბობს კოპაძე.

შეგახსენებთ, რომ ზარზმელის ქუჩის რეაბილიტაცია მიმდინარე წლის დასაწყისში დაიწყო. პროექტი რეგიონებში განსახორციელებელი პროექტების ფონდიდან დაფინანსდა, სამუშაოების შესასრულებლად 585.094 ლარი დაიხარჯა. ზარზმელის ქუჩაზე ასფალტი შპს "ასტორიამ" დააგო.

[თამარ თოთაძე, ახალციხე]