ახალციხეში მიქუტიშვილის ქუჩაზე მშენებარე გზის გაფართოებას ითხოვენ

მიქუტიშვილის ქუჩაზე ასფალტის დასაგებად სამუშაოები უკვე დაწყებულია. აღნიშნულ ქუჩაზე ასფალტს შპს „მესხეთ ავტოგზა“ აგებს. სამუშაოებისთვის 247.100 ლარია გამოყოფილი.

ადგილობრივები ამბობენ, რომ გზა ძალიან ვიწრო, 4,5 მ–ია და მანქანებს გავლა გაუჭირდებათ, ამიტომ მისი სიგანე 6 მეტრამდე უნდა გაიზარდოს.

„სახლის წინ მანქანა, რომ გააჩერო, სხვა მანქანა ვეღარ გაივლის. ვთხოვეთ, ტროტუარი და გზა შედარებთ დიდი გაეკეთებინათ, მაგრამ მერიაში აცხადებენ, პროექტი ასეა გაკეთებული და აღარაფერი შეიცვლეობაო. გზის სივიწროვის გამო ბავშვებიც ვეღარ გავლენ გარეთ“, – ამბობს მიქუტიშვილის ქუჩაზე მცხოვრები გელა გვირჯიშვილი.

გზის გაფართოებას ითხოვს სერგეი რაისიანიც: „ბაგინაშვილის ქუჩაზე ვცხოვრობ და ამ გზით ვსარგებლობ. მისი სიგანე ნახევარი მეტრით მაინც უნდა გაზარდონ“.

ახალციხის მუნიციპალიტეტის მერიაში განმარტავენ, რომ მიქუტიშვილის ქუჩაზე ასფალტი ცალმხრივად იგება და მისი სიგანე საგზაო სტანდარტების შესაბამისია. თუმცა, მოსახლეობის მოთხოვნის შემდეგ, პროექტი დააკორექტირეს და გზის სიგანე 4,5 მ–დან 5 მ–მდე გაიზრდება.

სამუშაოთა მწარმოებელი გიორგი აღლემაშვილი ამბობს, რომ ასფალტს დამატებით დაახლოებით 250 კვადრატულ მეტრზე დააგებენ.

„პროექტის კორექტირება მოხდება, იყო სხვა გაუთვალისწინებელი შემთხვევებიც, მაგალითად გზის მეორე მხარეს არ ვაკეთებდით ბორდიურებს, ახლა კი ვაკეთებთ. დამატებით ხარჯებს მერია მოიძიებს“, – ამბობს გიორგი აღლემაშვილი.

როდის დაიგება გზის მეორე მხარე, ჯერ გადაწყვეტილი არ არის .

„მიქუტიშვილის ქუჩაზე უნდა გაკეთდეს სკვერიც, მაგრამ ეს სამომავლოდაა გაწერილი. ინფრასტრუქტურის სამინისტროში პროექტები უკვე გაგზავნილი გვაქვს. დაფინანსების შემთხვევაში გარდა მიქუტიშვილის ქუჩისა გზები ქალაქის სხვა შიდა ქუჩებშიც მოწესრიგდება“, – აცხადებს ახალციხის მუნიციპალიტეტის მერის მოადგილე ზაზა გელაძე.


[თინათინ ზაზაძე, ახალციხე]