ახალციხეში ზარზმელის ქუჩის რეაბილიტაცია დაიწყება

ახალციხის მერიის ადმინისტრაციის სამსახურის შესყიდვების განყოფილების უფროსის დროებით მოვალეობის შემსრულებელის მანანა ბალიაშვილის განმარტებით, სახელმწიფო ბიუჯეტიდან თანხა ორი პროექტის განსახორციელებლად გამოიყო: „587 494 ლარი ზარზმელის ქუჩის რეაბილიტაციისათვის და 122 985 ლარი გვარამაძის ქუჩაზე გადასასვლელი ხიდის რეაბილიტაციისათვის“.

ქალაქ ახალციხის მუნიციპალიტეტის საკრებულოს წევრი „ნაციონალური მოძრაობიდან“ მალხაზ გიქოშვილი მიიჩნევს, რომ მანამდე ვიდრე ზარზმელის ქუჩაზე გზას გააკეთებენ, აქ მიწისქვეშა კომუნიკაციებთან ერთად გარე განათების საკითხიც უნდა მოგვარდეს.

ახალციხის მერიაში კი აცხადებენ, რომ ამ ეტაპზე ზარზმელის ქუჩაზე გარე განათების გაკეთება არ იგეგმება, რადგან სამომავლოდ აქ ე.წ. ეკონათურები და შესაბამისად, სხვა ტიპის გარე განათება დამონტაჟდება.

„როცა გზა კეთდება, ასფალტის დაგებასთან ერთად, განათებაც უნდა გაკეთდეს, თორემ მერე გზა გადაითხრება და იმას ისე, როგორც იყო, არასდროს არავინ აკეთებს“, - აცხადებს გიქოშვილი.

ცენტრალური ბიუჯეტიდან გადმორიცხული მიზნობრივი ტრანსფერის გამო დღეს, 2 ოქტომბერს ქალაქ ახალციხის მუნიციპალიტეტის საკრებულოს რიგით მეშვიდე სხდომაზე ბიუჯეტში ცვლილებები დაამტკიცეს.

„ცვლილება განვახორციელეთ ბიუჯეტში და მერიას მივეცით თანხმობა სამუშაოების შესყიდვის შესახებ“, - განაცხადა ქალაქ ახალციხის მუნიციპალიტეტის საკრებულოს თავმჯდომარემ კახა ბერიძემ.

[თამუნა უჩიძე, ახალციხე]