UDM-მ პროექტი ‘ეროვნული ინტეგრაციის გაძლიერება საქართველოში’ შეაჯამა

როგორ დაიწყო პროექტი, რა იყო მისი მიზანი, როგორ იკრებდა ახალგაზრდებს, როგორ მეგობრდებოდნენ და იზრდებოდნენ პროექტის წევრები, რა იყო ყველაზე სახალისო და ყველაზე დიდი გამოწვევა, რა და რატომ დაამახსოვრდათ სამწლიანი ერთობლივი მუშაობიდან ყველაზე მეტად, როგორ გადააფასეს ღირებულებები და როდის გაუჩნდათ განცდა, რომ სხვისი პრობლემა არ არსებობს, – ამის შესახებ პროექტის მონაწილე ახალგაზრდებმა სტუმრებს პრეზენტაციებითა და ვიდეორგოლებით უამბეს.

პრეზენტაციაში იყო ემოციური ნაწილიც, მაგალითად: ახალციხის ახალგაზრდული სამოქალაქო ცენტრის წევრების სტუმრობა ქალაქ თბილისში იაშვილის სახელობის ბავშვთა საავადმყოფოში.

ემოციური იყო სამოქალაქო ცენტრის წევრების ნაწილთა მოგონებებიც: რა განცდა ჰქონდათ, როცა პროექტში ჩართვის სურვილით ორგანიზაციაში მიდიოდნენ, როგორ განიცდიდნენ ქართული ენის არასათანადო ცოდნას, პირველ დავალებას, პირველ პრეზენტაციას და ა.შ.

პროექტს „ეროვნული ინტეგრაციის გაძლიერება საქართველოში“ საქართველოს გაეროს ასოციაცია ( UN Association of Georgia) აშშ-ს განვითარების სააგენტოს ( USAID/Georgia) ფინანსური მხარდაჭერით ახორციელებდა. პროექტი საქართველოს 13 ქალაქში ხორციელდება. სამცხე-ჯავახეთში პროექტის პარტნიორი საზოგადოებრივი ორგანიზაცია დემოკრატ მესხთა კავშირი, UDM იყო.

პროექტის ფარგლებში შეიქმნა სამოქალაქო აქტივიზმის ახალგაზრდული ქსელი. ქსელი მიზანი იყო სამოქალაქო აქტივიზმის და მოხალისეობის კულტურის დანერგვა ახალგაზრდებში; სამოქალაქო ინტეგრაციის, ჩართულობისა და მრავალფეროვნების მართვაში ახალგაზრდების ცნობიერების ამაღლება; საქართველოს სხვადასხვა რეგიონის ახალგაზრდებსა და საქართველოში მცხოვრებ ეთნოსებს შორის ინტეგრაციის გაძლიერება და ეთნიკური, რელიგიური თუ სხვა სტერეოტიპების წინააღმდეგ ერთობლივი მუშაობა.

ახალციხის ახალგაზრდულ ქსელში 366 ახალგაზრდა ჩაერთო, 44 ეთნიკურად სომეხი, 322 კი ქართველი. 366–დან 288 გოგონა იყო, 78 კი ვაჟი. ქსელი 6 მიმართულებით მუშაობდა: განათლება, გარემოს დაცვა, ტოლერანტობა, ჯანსაღი ცხოვრება, ადამიანის უფლებები და გენდერული თანასწორობა.

განათლების მიმართულებით ტარდებოდა: ტრენინგები, ინტელექტუალური თამაშები, პრეზენტაციები, საგანმანათლებლო ტურები, პოეზიის საღამოები, ფოტო კონკურსები, საინფორმაციო აქციები, ესეების კონკურსი და ფილმების ჩვენებები. გენდერულ თანასწორობაზე ახალგაზრდები აქციებს, ტრენინგებს, დისკუსიებსა და პრეზენტაციებს მართავდნენ. ადამიანის უფლებების მიმართულებით, აქციებს, ტრენინგებს, დისკუსიებსა და პრეზენტაციებს, ფილმების ჩვენებაც დაუმატეს. ფიზიკური აქტივობებით იყო დატვირთული ჯანსაღი ცხოვრების წესის მიმართულება: ტრენინგებთან, დისკუსიებთან და პრეზენტაციებთან ერთად ახალგაზრდები მართავდნენ ფლეშმობსა და მარათონებს. გარემოს დაცვის მიმართულებაში ტრენინგებსა და პრეზენტაციებს დასუფთავების აქციები დაემატა. ტოლერანტობის მიმართულებაში აქციებს, ტრენინგებს, დისკუსიებსა და პრეზენტაციებს, ფილმის ჩვენება და სკაიპკონფერენცები დაუმატეს.

გარდა ახალციხის ახალგაზრდულ ქსელის აქტივობებისა, პროექტის საერთო ღონისძიებები იყო გაცვლითი პროგრამები, გაეროს მოდელირება და საზაფხულო და თემატური სკოლები. ახალციხელი ახალგაზრდებისთვის გაცვლითი პროგრამები ბათუმთან, ზუგდიდთან, ქუთაისთან და გორთან შედგა.

პროექტის მონაწილეები ამბობენ, რომ 3–წლიანი ინტენსიური საგანმანათლებლო ღონისძიების საშუალებით ახალციხის ახალგაზრდულმა ცენტრმა მიიღო თვალსაჩინო შედეგი: ახალგაზრდები აქტიურად ჩაერთვნენ სამოქალაქო აქტივიზმში; ეთნიკური და რელიგიური უმცირესობები გახდნენ მეტად ინტეგრირებული საზოგადოებაში და ამაღლდა ცნობიერება როგორც ახალგაზრდებში, ასევე უფროს თაობაში.

პრეზენტაციის შემდეგ იყო საზეიმო ტორტი, ფურშეტი და ახალგაზრდების ერთობლივი ფოტო.



[ნინო ნარიმანიშვილი, ახალციხე]