ახალციხეში ტოლერანტობის საერთაშორისო დღე აღნიშნეს

ტოლერანტობის დღის აღნიშვნა ახალგაზრდებმა პრეზენტაციით დაიწყეს, მათ ჯერ ტოლერანტობაზე ისაუბრეს, შემდეგ ახალციხის ახალგაზრდული სამოქალაქო ცენტრის წევრების მიერ გადაღებული ვიდეო-რგოლები აჩვენეს. მოგვიანებით კი ტოლერანტობის თემაზე ინტელექტუალური თამაში გაიმართა.

„როგორც აღმოჩნდა, ჩვენთან საკმაოდ ტოლერანტი ბავშვები არიან. ყველამ აღნიშნა, რომ ჰყავთ მეგობრები სხვადასხვა ეთნიკური დარელიგიური უმცირესობიდან და ძალიან ტოლერანტები არიან“, - ამბობს ახალციხის ახალგაზრდული სამოქალაქო ცენტრის წევრი გვანცა ჩინჩალაძე.

„დემოკრატ მესხთა კავშირის“ საკონფერენციო დარბაზში გამართული ღონისძიების შემდეგ, ახალგაზრდები ახალციხის მეშვიდე საჯარო სკოლის მოსწავლეებს ესტუმრნენ.

„ჩვენ გადავწყვიტეთ, რომ მეშვიდე საჯარო სკოლის მოსწავლეებისთვის მიგველოცა დღევანდელი დღე და სიმბოლურად მოვაწყეთ გასართობი ღონისძიებაც“, - ამბობს პროექტ „ეროვნული ინტეგრაციის გაძლიერება საქართველოში“ კოორდინატორი ნათია გელაშვილი.

დღესვე გაიმართა არასამთავრობო ორგანიზაცია „დემოკრატ მესხთა კავშირის“ მიერ გამოცხადებულ ფოტო-კონკურსში - „გვიანი შემოდგომა“ გამარჯვებულების დაჯილდოვებაც.

"ჩავატარეთ ფოტო-კონკურსი თემაზე: „გვიანი შემოდგომა“. ორი კვირის განმავალობაში იყო შესაძლებელი ამ თემაზე გადაღებული ფოტოების გამოგზავნა. გვყავს ორი გამარჯვებული, რომელიც ჟიურიმ შეარჩია, ხოლო ერთი კონკურსანტი გვყავს, რომლის ფოტომაც ფეისბუქის გვერდზე ყველაზე მეტი მოწონება მიიღო“, - ამბობს ნათია გელაშვილი.

აღნიშნულ კონკურსში პირველი ადგილი არმინე მანველიანმა მიიღო, მეორე ადგილის მფლობელი თემო ინასარიძე გახდა, ფეისბუქზე ყველაზე მეტი მოწონება კი თაკო მურადაშვილის ფოტომ მიიღო.

[თამარ თოთაძე, ახალციხე]