როგორ ესმით ახალციხელ ახალგაზრდებს გენდერული თანასწორობა

რა არის გენდერული თანასწორობა, რა მდგომარეობაა ამ მიმართულებით რეგიონის მუნიციპალიტეტების ადგილობრივი თვითმმართველობის დონეზე, რას ფიქრობენ სოფლებში, როგორ ხდება ოჯახებში გადაწყვეტილების მიღება, - ამ საკითხებზე 25 ნოემბერს, ქალთა მიმართ ძალადობის აღმოფხვრის საერთაშორისო დღეს ახალციხელმა ახალგაზრდებმა იმსჯელეს.

„ახალგაზრდებს გავაცანით რა მდგომარეობაა საქართველოში გენდერული თანასწორობის კუთხით. ვისაუბრეთ საერთაშორისო კონვენციებზე, რა გვავალდებულებს, რომ განვახორციელოთ გენდერული თანასწორობის მიმართულებით გარკვეული საქმიანობები“, - ამბობს „მერსი ქორფსის“ გენდერული საკითხების კოორდინატორი ნინო ლომიძე.

საერთაშორისო არასამთავრობო ორგანიზაცია „მერსი ქორფსის“ წარმომადგენლებმა ახალგაზრდებთან ამ მიმართულებით ორგანიზაციის მიერ განხორციელებულ პროექტებზეც ისაუბრეს.

„ვისაუბრეთ თუ რა მდგომარეობაა ამ მიმართულებით სოფლის დონეზე, ადგილობრივი თვითმმართველობის დონეზე. შემდეგ კი გაიმართა დისკუსია, როგორ ხდება ოჯახებში გადაწყვეტილების მიღება. ახალგაზრდებს ესმით ზოგადად გენდერული თანასწორობის ცნება, არ აღიქვამენ გენდერულ თანასწორობას ისე, რომ ეს არის კაცის როლის დაკნინება“, - ამბობს ნინო ლომიძე.

დისკუსიის დამთავრების შემდეგ ახალგაზრდებმა პრეზენტაცია გამართეს და შეეცადნენ გადმოეცათ რა არის ძალადობა და რა ფორმით შეიძლება ვლინდებოდეს იგი.

„შევეცადეთ, რომ აქ მყოფი საზოგადოებისთვის აგვეხსნა ძალადობის რა ფორმები არსებობს, გაგვეცნო ძველ დროში რა ხდებოდა და როგორ მდგომარეობაში უწევდათ ქალებს ცხოვრება, შემდეგ კი თანამედროვე პერიოდზე ვისაუბრეთ. ასევე საქართველოში არსებული მდგომარეობა განვიხილეთ, კიდევ ერთხელ ავხსენით მიზეზები, რატომ ვლინდება ძალადობის ასეთი მძიმე ფორმები“, - ამბობს ახალციხის ახალგაზრდული სამოქალაქო ცენტრის წევრი ანა მურადაშვილი.

დისკუსია ორგანიზაცია „დემოკრატ მესხთა კავშირის“ საკონფერენციო დარბაზში, პროექტის "ეროვნული ინტეგრაციის გაძლიერება საქართველოში" ფარგლებში გაიმართა. პროექტი საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს მხარდაჭერით ხორციელდება.

[თამარ თოთაძე, ახალციხე]