რატომ მიიღეს საყვედური გამგებლის წარმომადგენლებმა

გამგეობის თათბირზე ახალციხის მუნიციპალიტეტის გამგებლის მოადგილე გურამ მელიქიძე დაინტერესდა, როგორ მიმდინარეობს სოფლებში ხვნის ბარათების დარიგების პროცესი.

ახალციხის მუნიციპალიტეტის გამგეობის ეკონომიკური განვითარებისა და ქონების მართვის სამსახურის უფროსმა ნოდარი ტალახაძემ აღნიშნა, რომ ვალეში ხვნის ბარათების ნაწილი ჯერ კიდევ დასარიგებელია, რის გამოც საყვედური გამგებლის წარმომადგენელმა ვალეში ელიოზ ბარბლიშვილმა მიიღო: „ვალეში ხვნის ბარათები ამ დრომდე არ დარიგებულა, რა პრობლემაა? ვადები იწურება ამიტომ იქნებ დავაჩქაროთ პროცესი“.

როგორც ელიოზ ბარბლიშვილმა განმარტა, ვალეში მიწები იმ მოსახლეობაზეც არის განაწილებული, ვინც ამ ეტაპზე ქალაქში არ იმყოფება, ხვნის ბარათების დარიგება ამიტომ შეფერხდა.

„ვალე დიდი უბანია, სულ 837 ბენეფიციარია, ამიტომ ხვნის ბარათების დარიგება ჯერ კიდევ არ დასრულებულა, გარდა ამისა, ვისაც ბარათები ეკუთვნის ამ ეტაპზე ადგილზე არ არიან, ველოდებით მათ, სავარაუდოდ სააღდგომოდ დაბრუნდებიან და ვალეშიც დასრულდება ხვნის ბარათების დარიგება“, – ამბობს ელიოზ ბარბლიშვილი.

ვალის გარდა ხვნის ბარათებთან დაკავშირებით საყვედური გამგებლის სხვა წარმომადგენლებმაც მიიღეს. ნოდარი ტალახაძის თქმით, სოფლებიდან ინფორმაციას იმის შესახებ თუ რამდენი ჰექტარი ფართობი მიწა მუშავდება ყოვედღიურად და რომელ სოფლებში მუშაობს ტრაქტორი ვეღარ ღებულობს.

„დღის ბოლოს ქონების მართვის სამსახურს უნდა ჰქონდეს ინფორმაცია სად მუშაობს ტრაქტორი, რომელ სოფლებში და ყოვედღიურად რა ფართობი მიწა იხვნება. ეს ინფორმაცია კი თქვენ, გამგებლის წარმომადგენლებმა უნდა გვითხრათ“, – განაცხადა გურამ მელიქიძემ თათბირზე.

რწმუნებულებმა ხელმძღვანელებისგან საყვედური "სოფლის მხარდაჭერის პროგრამის" ფარგლებში დაგეგმილი კრებების გამოც მიიღეს. როგორც ნოდარ ბალახაშვილმა აღნიშნა, სოფლის კრებებს მოსახლეობა არ ესწრება და გამგეობის წარმომადგენლებს პრიორიტეტების შესარჩევად კრების ჩატარება მეორედ უწევთ.

"მაგალითად აგარაში უკვე ორჯერ ჩავატარეთ კრება და ორჯერვე 7, მაქსიმუმ 10 კაცი ესწრებოდა კრებას. რაც ძალიან ცუდი მუშაობის შედეგია", – აღნიშნა ბალახაშვილმა.

გურამ მელიქიძემ განაცხადა, რომ პრიორიტეტების შერჩევა ყველა სოფელში 10 აპრილამდე უნდა დასრულდეს: "ამის შემდეგ დაიწყება "სოფლის მხარდაჭერის პროგრამის" ფარგლებში გათვალისწინებული სამუშაოები".

შეგახსენებთ, რომ რწმუნებულებმა შენიშვნა გასულ კვირას, ახალციხის მუნიციპალიტეტის გამგებლისგან ზაზა მელიქიძისგანაც მიიღეს.

[მანანა სარაშვილი, ახალციხე]