სოფლები ახალ პრიორიტეტებს შეარჩევენ

ამის შესახებ ახალციხის მუნიციპალიტეტის გამგეობის ორშაბათის ტრადიციულ თათბირზე ისაუბრეს. გამგებლის მოვალეობის შემსრულებელმა ბესიკ ბლიაძემ რწმუნებულებისგან „სოფლის მხარდაჭერის პროგრამის“ მიმდინარეობის შესახებ ინფორმაცია მიიღო. თათბირზე რწმუნებულებმა განაცხადეს, რომ რამდენიმე სოფელში პროექტის დასრულების შემდეგ გარკვეული თანხა დარჩათ.

„სოფლის მხარდაჭერის პროგრამის" ფარგლებში სოფელ მუსხში წყლის ავზები შეკეთდა და რიტუალების სახლი გაკეთდა. პროექტი უკვე დასრულებულია, თანხა 1 080 ლარი დარჩა და სოფლის მოსახლეობის მოთხოვნაა, რომ ეს ფული რიტუალების სახლისთვის ჭურჭელი შევისყიდოთ“, - ამბობს ურავლის ტერტიორიული ორგანოს რწმუნებული ბადრი ზაზაძე.

გამგებლის მოვალეობის შემსრულებლის განმარტებით, „სოფლის მხარდაჭერის პროგრამის“ ფარგლებში განხორციელებული პროექტებიდან დარჩენილი თანხა სხვა პრიორიტეტებს მოხმარდება.

„თანხა, რომელიც პროექტისთვის გამოიყენეს და ნაშთად დარჩა, შესაძლებელია რომ იგივე მიმართულებით გამოიყენონ, არანაირი პრობლემა არ იქნება და მოსახლეობას შეუძლია ახლავე გამოიყენოს ეს თანხა. მაგრამ თუ პრიორიტეტის შეცვლა უნდათ, მაშინ არჩევნების დამთავრებას უნდა დაელოდონ. ჩვენ ვუშუამდგომლებთ სამინისტროსთან, ახალი პრიორიტეტი აირჩევა და ათვისებული იქნება მთლიანი თანხა, რაც ამ პროგრამის ფარგლებში არის გამოყოფილი“, - ამბობს ბესიკ ბლიაძე.

[თამარ თოთაძე, ახალციხე]