ახალციხის გამგეობაში საკრებულოს დეპუტატებს საყვედურობენ

ბალახაშვილის განცხადებით, კრებებში, რომლებზეც „სოფლის მხარდაჭერის პროგრამის“ პრიორიტეტები უნდა შეირჩეს, მოსახლეობის ხუთი პროცენტიც არ იღებს ხშირად მონაწილეობას. ინფრასტრუქტურის სამსახურის უფროსი ამას ხალხის ნაკლები ინფორმირებულობით ხსნის.

„სოფლის კრებების ორგანიზება ძალიან დაბალ დონეზე გვაქვს, „ბირჟის“ ბიჭებით სოფლის საკითხი არ უნდა წყდებოდეს. არის შემთხვევები, როცა სოფლის კრებებზე მივდივართ და დეპუტატი იქ არ არის, ეს ანომალიურია“, – ასე მიმართა ბალახაშვილმა დღეს, 9 თებერვლას საკრებულოს სხდომაზე დეპუტატებს.

არ დაეთანხმა მას წყალთბილის ტერიტორიულ ორგანოში დეპუტატი ტიგრან მელქოიანი: „ბირჟაზე“ რომ ხალხი დგას, საქმეს ეს ხალხი აკეთებს–ხოლმე, აბა დედაჩემი რომ მოვიყვანო იქ რა უნდა გააკეთოს?!“

ასევე დეპუტატების განცხადებით, მათ სოფლის კრებების შესახებ ინფორმაცია სოფლის რწმუნებულებმა უნდა მიაწოდონ. ბალახაშვილი კი ამბობს, რომ რწმუნებულსა და დეპუტატს შორის კომუნიკაცია ორმხრივი უნდა იყოს: „თუ რომელიმე სოფელში კრების შესახებ არ იცით, ვისშია პრობლემა?! დეპუტატებს სოფლის მაჯისცემაზე ხელი უნდა გედოთ“.

ელიაწმინდის თემის გაერთიანების დეპუტატი კობა სანდროშვილი ირწმუნება, რომ არცერთი დეპუტატი არ იტყვის უარს სოფლის კრებას დაესწროს და პრიორიტეტის შერჩევაში თავადაც ჩერთოს, თუმცა იგი ბალახაშვილის საყვედურს არ ღებულობს და ამბობს, რომ კრებების ორგანიზება სოფლის რწმუნებულების საქმეა.

ბალახაშვილი კი ირწმუნება, რომ სოფლებში დეპუტატების ჩართულობა ნაკლებია: „არ არიან სათანადოდ აქტიურები, რწმუნებულებს კი ვერ დავემდურები, ისინი უფრო მიდიან ხალხთან, ავრცელებენ განცხადებებსაც“.

„სოფლის მხარდაჭერის პროგრამის“ ფარგლებში მიმდინარე წელს დაახლოებით 700 000 ლარი დაიხარჯება. ახალციხის გამგეობაში აცხადებენ, რომ პრიორიტეტების შესარჩევად სოფლებში გასვლა უკვე დაიწყეს.

[თამუნა უჩიძე, ახალციხე]