ექსპერტი თამარ ნიკოლოზიშვილი, რომელმაც ბებიისა და შვილიშვილის მკვლელობაში ბრალდებული გენადი ი–ს ფსიქიკური ექსპერტიზა ჩაატარა, ირწმუნება, რომ მაშინ, როცა მკვლელობა მოხდა, ბრალდებული საკუთარ ქმედებას აცნობიერებდა, ციხეში მოხვედრის შემდეგ კი მისი ფსიქიკურ–ფსიქოლოგიური მდგომარეობა გამწვავდა.
მისი დასკვნის მიხედვით, გენადი ი. ქრონიკული ფსიქიკური დაავადებით, პარანოიდული შიზოფრენიითაა დაავადებული. ამიტომ განაჩენის გამოტანის შემდეგ მან სასჯელი შესაბამის დაწესებულებაში უნდა მოიხადოს.
„ჩვენ გენადი ი.–ს სტაციონარულ–ფსიქილოგიურ–ფსიქიატრიული გამოკვლევა ჩავუტარეთ. ასევე შევისწავლეთ მისთვის 2009 წელს გახსნილი ამბულატორიული სამედიცინო ბარათი. მისი მიხედვით, გენადი შიზოფრენიით იყო დაავადებული“, – განაცხადა ახალციხის რაიონული სასამართლოში დღეს, 10 მარტს გამართულ სასამართლო პროცესზე ნიკოლოზიშვილმა და დაამატა, რომ როგორც ეს საქმის მასალებიდანაც ირკვევა, მაშინ, როცა მკვლელობა მოხდა, გენადი ი.–ს ფსიქიკური მდგომარეობა გართულებული არ იყო, – „ასე რომ ყოფილიყო, ის ჩვეულებრივი სოციალური ცხოვრებით ვერ იცხოვრებდა. ასევე, მას 2013 წელს მართვის მოწმობა აქვს მიღებული“.
ადვოკატ რამინ პაპიძის კითხვაზე, იგი ეჭვქვეშ აყენებს თუ არა 2009 წელს დასმულ დიაგნოზს და განკურნებადია თუ არა შიზოფრენია, ექსპერტმა უპასუხა, რომ 2009 წლის დიაგნოზში ეჭვი არ შეაქვს: „რაც შეეხება შიზოფრენიას, ეს განუკურნებელი დაავადებაა, თუმცა პრაქტიკაში განკურნების შემთხვევებიც არსებობს“.
ნიკოლოზიშვილის შემდეგ სასამართლოს ჩვენება სამცხე–ჯავახეთის სამხარეო მთავარი სამმართველოს გამომძიებელმა გიორგი ფარცახაშვილმა მისცა. მან, საქმეში, რიგი საგამოძიებო ღონისძიებები ჩაატარა. მაგალითად, ფარცახაშვილმა დაათვალიერა შემთხვევის ადგილი და ასევე, მან ამოიღო ის იარაღი, რომლიდანაც გაისროლეს.
„იარაღზე ბრალდებულის დამ მაყვალა იაკობაძემ მიგვითითა. ის ეზოში, ბალახებში, ლითონის მილში იყო დამალული“, – განაცხადა ფარცახაშვილმა.
მისი თქმით, იარაღის ლულაში იყო ვაზნა, რომელიც თავდაცვის სამინისტროს ინფორმაციით სპეცდანიშნულების აღმოჩნდა. ფარცახაშვილმა განმარტა, რომ აღნიშნული ვაზნიდან თითის ანაბეჭდები არ აუღიათ: „ალბათ არ ჩავთვალეთ ანაბეჭდების აღება საჭიროდ და იმიტომ“.
ადვოკატის კითხვებზე, მან ან მისმა თანამშრომლებმა ხომ არ ჩადეს ვაზნა იარაღში, ფარცახაშვილმა განაცხადა: „გამორიცხულია, ეს ვაზნა იქ იდო, განმუხტვისას ჩვენ ამოვიღეთ“.
ფარცახაშვილის დაკითხვის შემდეგ ჩვენება პოლიციის კიდევ ერთმა თანამშრომელმა ლევან ალელიშვილმა მისცა. მან ბრალდებულის დაკავებაში მიიღო მონაწილეობა: „გენადი 12 ივლისს, გამთენიისას მისი დის, მაყვალა იაკობაძის სახლში შესვლისას დავაკავეთ. წინააღმდეგობა არ გაუწევია“.
მომავალ პროცესზე, პროკურორ ვასილ ოსიძის შუამდგომლობით, ორი ექსპერტი დისტანციურად დაიკითხება. მომავალი სხდომა 24 მარტს 13:00 საათზე გამართება.
შეგახსენებთ, მიმდინარე წლის 10 ივლისს, დაახლოებით 20:00 საათზე, წარსულში ნასამართლევმა გენადი ი.– მ, კარაბინის ტიპის ცეცხლსასროლი იარაღით საყვარელ გოგონას, რომელიც ცოლად სხვას გაჰყვა, დედა და 8 თვის შვილი
მოუკლა. სამართალდამცველებმა მკვლელობაში ბრალდებული მომხდარიდან რამდენიმე საათში
დააკავეს. .
[თამუნა უჩიძე, ახალციხე]