ახალციხის სასამართლო ბებიისა და შვილიშვილის მკვლელობაში ბრალდებულის საქმეს განიხილავს

სასამართლო პროცესს არ ესწრება ბრალდებული. შეგახსენებთ, რომ სამხარაულის ექსპერტიზის ეროვნული ბიუროს ფსიქიატრიული დასკვნის მიხედვით, გენადი ი. ქრონიკული ფსიქიკური ავადმყოფია და პარანოიდული შიზოფრენიითაა დაავადებული.

ამავე ექსპერტიზის დასკვნის თანახმად, ამჟამად „გენადი ი.–ს ფსიქიკური მდგომარეობის გამო არ შეუძლია ანგარიში გაუწიოს თავს, უხელმძღვანელოს მას, მისცეს ჩვენება და მონაწილეობა მიიღოს საგამოძიებო და სასამართლო მოქმედებებში“.

ამ წუთებში სასამართლოში იმ ექსპერტს ჰკითხავენ, რომელმაც ბრალდებულს ფსიქიატრიული ექსპერტიზა ჩაუტარა.

შეგახსენებთ, მიმდინარე წლის 10 ივლისს, დაახლოებით 20:00 საათზე, წარსულში ნასამართლევმა გენადი ი.– მ, კარაბინის ტიპის ცეცხლსასროლი იარაღით საყვარელ გოგონას, რომელიც ცოლად სხვას გაჰყვა, დედა და 8 თვის შვილი მოუკლა. სამართალდამცველებმა მკვლელობაში ბრალდებული მომხდარიდან რამდენიმე საათში დააკავეს.

[sknews.ge]