ბებიისა და შვილიშვილის მკვლელობაში ბრალდებულს პატიმრობის ვადა ეწურება

გოგაშენში ბებიისა და შვილიშვილის მკვლელობაში ბრალდებულის გენადი ი–ს საქმეზე დღეს, დაცვის მხარის მოწმე, ექსპერტი უნდა დაკითხულიყო და შემდეგ სასამართლოს მხარეების დასკვნითი სიტყვები მოესმინა, თუმცა, არც მოწმე დაკითხულა და არც საბოლოო სიტყვები წაუკითხავთ. სხდომა შვიდ აპრილამდე იმ მიზეზით გადაიდო, რომ ამ დღეს დაცვის მხარის ექსპერტი სასამართლოს ჩვენებას მისცემს.

„ჩვენი მოწმე წინა პროცესზე უნდა დაკითხულიყო, მაგრამ გულის შეტევა დაემართა და ეს ფიზიკურად ვერ მოხერხდა, ახლა ჯანმრთელობის მდგომარეობა გაუუმჯობესდა და მომავალ სხდომაზე შეძლებს ჩვენების მიცემას“, – ამბობს ადვოკატი რამინ პაპაიძე.

პროკურორისა და გარდაცვლილების ახლობლების თქმით, ეს დაცვის მხარის მხრიდან პროცესის გაჭიანურებას ემსახურება.
„ამხელა გზაზე ჩამოვდივართ და ასე განგებ იქცევიან“, – აცხადებენ გოგაშნელები.

ამას კატეგორიულად უარყოფს ადვოკატი და ამბობს, რომ შვიდ აპრილს მისი მოწმე გამოცხადდება, ამიშ შემდეგ მხარეები დასკვნით სიტყვას წაიკითხავენ და სასამართლო განაჩენს პატიმრობის ვადის ამოწურვამდე გამოაცხადებს.

შეგახსენებთ, მიმდინარე წლის 10 ივლისს, დაახლოებით 20:00 საათზე, წარსულში ნასამართლევმა გენადი ი.– მ, კარაბინის ტიპის ცეცხლსასროლი იარაღით საყვარელ გოგონას, რომელიც ცოლად სხვას გაჰყვა, დედა და 8 თვის შვილი მოუკლა. სამართალდამცველებმა მკვლელობაში ბრალდებული მომხდარიდან რამდენიმე საათში დააკავეს.

[თამუნა უჩიძე, ახალციხე]