ბებიისა და შვილიშვილის მკვლელობაში მსჯავრდებულისთვის სააპელაციოში გამამართლებელ განაჩენს ითხოვენ

გენადი იაკობაძის ადვოკატი რამინ პაპიძე ახალციხის რაიონული სასამართლოს გადაწყვეტილებას სააპელაციო სასამართლოში დღეს, 4 მაისს გაასაჩივრებს. პაპიძე პირველი ინსტანციის სასამართლოს გადაწყვეტილების ბათილად ცნობას ითხოვს. შეგახსენებთ, რომ გენადი იაკობაძე დამნაშავედ ცნეს სისხლის სამართლის კოდექსის 236–ე მუხლის 1–ლი და მე–2 ნაწილით და ასევე, 109–ე მუხლის 1გ, 2ბ და 3 ა ნაწილებით და 2–წლიანი პატიმრობა მიუსაჯეს.

„ექსპერტიზით დადგენილია, რომ იაკობაძე შეურაცხადია, ამიტომ მის გამართლებას ვითხოვთ“, – ამბობს იაკობაძე.

შეგახსენებთ, მიმდინარე წლის 10 ივლისს, დაახლოებით 20:00 საათზე, წარსულში ნასამართლევმა გენადი ი.– მ, კარაბინის ტიპის ცეცხლსასროლი იარაღით საყვარელ გოგონას, რომელიც ცოლად სხვას გაჰყვა, დედა და 8 თვის შვილი მოუკლა. სამართალდამცველებმა მკვლელობაში ბრალდებული მომხდარიდან რამდენიმე საათში დააკავეს.

გოგაშენში მომხდარი მკვლელობაც და ამ საქმეზე მიმდინარე სასამართლო პროცესებიც, რეგიონში ბოლო პერიოდში ყველაზე გახმაურებული მოვლენები იყო.

მომხდარის შემდეგ სოფელ გოგაშენში დაზრალებულებისა და მკვლელობაში ბრალდებულის ახლობლებს შორის დაპირისპირება დაიწყო. ბრალდებულის დების ოჯახებს გარკვეული პერიოდის განმავლობაში სოფლის დატოვებაც მოუხდათ.

მომხდარს აქციები და სოფელში დაპირისპირებები მოჰყვა. შემთხვევიდან 6 თვის შემდეგ, მაყვალა და მაგული იაკობაძეები მკვლელობის ღამეს, სამმართველოს შენობაში, მათზე მომხდარ სიტყვიერ და ფიზიკურ ზეწოლასა და გაუპატიურების მუქარაზე ალაპარაკდნენ. ამ ამბის „სამხრეთის კარიბჭეში“ გამოქვეყნებას კი რედაქციასთან დაზარალებულების ახლობლების აქციები მოჰყვა.

დაპირისპირებების ფონზე მიმდინარეობდა სასამართლო პროცესებიც ახალციხის რაიონულ სასამართლოში.

[თამუნა უჩიძე, ახალციხე]