ზაქარია ენდელაძე: 'იმედი მაქვს, საკრებულოს თავმჯდომარესთან კონსტრუქციულად და ნაყოფიერად ვიმუშავებ'

ადიგენის მუნიციპალიტეტის გამგებელს, ზაქარია ენდელაძეს, ახალი მოწვევის საკრებულოს შემადგენლობა მოსწონს.

ენდელაძეს იმედი აქვს, რომ მათთან ერთად შეძლებს იმ პრობლემების მოგვარებას, რასაც წინასაარჩევნოდ ამომრჩეველს დაჰპირდა: „ეს ის კოლექტივია, რომელიც მოსახლეობამ აირჩია. თითოეულ მათგანს მეც დიდი იმედით ვუყურებ. თითქმის დარწმუნებული ვარ, რომ ეს ადამიანები მხარში ამომიდგებიან და ერთად შევძლებთ იმ პრობლემების მოგვარებას, რაც ჩვენი რაიონის მოსახლოებას წლებია აწუხებს“.

მისივე თქმით ახალი საკრებულოს თავმჯდომარე ლევან ლობჯანიძე კომუნიკაბელური და განათლებული პიროვნებაა.

„საკრებულოს თავმჯდომარე რამდენიმე თვეა რაც გავიცანი. იმედი მაქვს, რომ მასთან კონსტრუქციულად და ნაყოფიერად ვიმუშავებ“, – ამბობს ენდელაძე.

როგორც ზაქარია ენდელაძე ამბობს, პირველი რაც ადიგენის მუნიციპალიტეტში უნდა გაკეთდეს, დასაქმების პრობლემის მოგვარებაა.

„ეს არ იქნება ადვილი, მაგრამ, ყველაფერს გავაკეთებთ იმისთვის, რომ რასაც დავპირდით მოსახლეობას, შევასულოთ. უნდა მოხდეს აბასთუმნის რეაბილიტაცია, ეს ავტომატურად ნიშანავს ბევრ დასაქმებულ მუშახელს. აბასთუმნის განვითარება პირდაპირ შეუწყობს ხელს ჩვენი რაიონის განვითარებას. ასევე არის რამდენიმე პრედენდენტი, რომლებიც ყოფილი საკონსერვო ქარხნის აღდგენას დაიწყებენ. დიდი იმედი მაქვს, რომ ეს ქარხანა დაუბრუნდება ჩვეულ სამუშაო რიტმს“.

შეგახსენებთ, დღეს, 14 ივლისს, ახალი მოწვევის საკრებულოს სხდომაზე ადიგენის მუნიციპალიტეტის საკრებულოს თავმჯდომარედ ლევან ლობჯანიძე,მის მოადგილედ კი თამაზ ძაძამია აირჩიეს.

[მანანა სარაშვილი, ადიგენი]