ახალციხის საკრებულომ 'თავისუფალი დემოკრატების' წევრთან სასამართლო დავა წააგო

მოსამართლე მარიკა ჩიტაშვილმა, ახალციხის საკრებულოს გოგოლაძის იურიუდიული კომიტეტის თავმჯდომარედ დაბრუნება და მისთვის იძულებითი განაცდური საათების, ჯამში 4.500 ლარის ანაზღაურება დააკისრა.

თუმცა, მოსამართლემ არ დააკმაყოფილა გოგოლაძის სარჩელი პოლიტიკური დისკრიმინაციის ნაწილში. შეგახსენებთ, იურიდიული კომიტეტის ყოფილი თავმჯდომარე მორალური ზიანის ასანაზღაურებლად 3.000 ლარს ითხოვდა.

ახალციხის საკრებულოში ამბობენ, რომ სასამართლოს გადაწყვეტილება მათთვის მოულოდნელი იყო. მოულოდნელი იყო სასამართლოს გადაწყვეტილება საკრებულოში უმრავლესობის წარმომადგენლის გელა პეტაშვილისთვისაც, რომელიც გოგოლაძის გადაყენების შემდეგ ამ პოზიციაზე დაინიშნა.

გაასაჩივრებს თუ არა საკრებულო სასამართლოს გადაწყვეტილებას, ჯერ უცნობია.

პროცესს დღეს "თავისუფალი დემოკრატების" ლიდერი ირაკლი ალასანიაც ესწრებოდა.

„დღეს ახალციხეში ერთი უსამართლობა დავამარცხეთ და ხვალ უსამართლობას მთელ საქართველოში დავამარცხებთ! სამართლიანობა აღდგა, ეს ძალიან კარგი პრეცენდენტია", – ასე შეაფასა მომხდარი ირაკლი ალასანიამ.

შეგახსენებთ, რომ შალვა გოგოლაძე, საკრებულოს იურიდიული კომიტეტის თავმჯდომარეობიდან, 2014 წლის 21 ნოემბერს, საკრებულოს რიგგარეშე სხდომაზე, დეპუტატებმა ხმათა უმრავლესობით გადააყენეს. გოგოლაძე თანამდებობიდან მას შემდეგ გადააყენეს, რაც ირაკლი ალასანიამ კოალიცია დატოვა. გოგოლაძე ამ დრომდე რჩება პარტიაში და ფიქრობს, რომ მას პოსტი სწორედ ამიტომ დაატოვებინეს.

ახალციხის რაიონულ სასამართლოს გოგოლაძემ 18 დეკემბერს, ადმინისტრაციული სარჩელით მიმართა. გოგოლაძე საკრებულოს 2014 წლის 21 ნოემბრის №48 განკარგულების ბათილად ცნობას ითხოვდა.

[თამუნა უჩიძე, გიორგი ლონდარიძე, ახალციხე]