'თავისუფალი დემოკრატების’ წევრმა შალვა გოგოლაძემ ახალციხის საკრებულოს სასამართლო მოუგო

სასამართლომ ბათილად ცნო 2014 წლის 21 ნოემბრის №48 განკარგულება, რომლის საფუძველზეც გოგოლაძე კომიტეტის თავმჯდომარეობიდან გადააყენეს. სასამართლოს გადაწყვეტილებით, ახალციხის საკრებულოს დაევალა შალვა გოგოლაძისთვის, იძულებით განაცდურის ანაზღაურება, 4500 ლარით. ასევე, სასამართლომ გადაწყვიტა, რომ გოგოლაძე დაუყოვნებლივ აღადგინონ პოზიციაზე.

შეგახსენებთ, შალვა გოგოლაძე სარჩელის დაკმაყოფილების შემთხვევაში, მორალური ზიანის 3.000 ლარით ანაზღაურებას ითხოვდა. სასამართლომ მისი ეს მოთხოვნაა არ დააკმაყოფილა.

შალვა გოგოლაძის პროცესს, ისევე როგორც გასულ სასამართლოს, დღესაც დაესწრო „თავისუფალი დემოკრატების“ ლიდერი ირაკლი ალასანია.

შეგახსენებთ, რომ შალვა გოგოლაძე, საკრებულოს იურიდიული კომიტეტის თავმჯდომარეობიდან, 2014 წლის 21 ნოემბერს, საკრებულოს რიგგარეშე სხდომაზე, დეპუტატებმა ხმათა უმრავლესობით გადააყენეს. საკრებულოს 15 დეპუტატიდან მის გათავისუფლებას მხარი 10–მა დაუჭირა. გოგოლაძე თანამდებობიდან მას შემდეგ გადააყენეს, რაც ირაკლი ალასანიამ კოალიცია დატოვა. გოგოლაძე ამ დრომდე რჩება პარტიაში და ფიქრობს, რომ მას პოსტი სწორედ ამიტომ დაატოვებინეს.

ახალციხის რაიონულ სასამართლოს გოგოლაძემ 18 დეკემბერს, ადმინისტრაციული სარჩელით მიმართა. გოგოლაძე საკრებულოს 2014 წლის 21 ნოემბრის №48 განკარგულების ბათილად ცნობას ითხოვდა.

[SKnews.ge]