შალვა გოგოლაძეს იძულებით განაცდურ 4 500 ლარს აუნაზღაურებენ

ახალციხის საკრებულოს წევრის, „თავისუფალი დემორკატების“ წარმომადგენლის შალვა გოგოლაძისთვისთვის იძულებით განაცდური საათების ასანაზღაურებლად მუნიციპალიტეტის ბიუჯეტში შესატან ცვლილებას კენჭი საკრებულოში დღეს, 28 აპრილს უყარეს. კუთვნილი 4 500 ლარის მისაღებად გოგოლაძე სწორედ ბიუჯეტში ცვლილების შეტანას ელოდა. ამისთვის ახალციხის მუნიციპალიტეტის საკრებულოს 2014 წლის 29 დეკემბრის N60 დადგენილებაში ცვლილება დღეს შევიდა.

შეგახსენებთ, რომ შალვა გოგოლაძე, საკრებულოს იურიდიული კომიტეტის თავმჯდომარეობიდან, 2014 წლის 21 ნოემბერს, საკრებულოს რიგგარეშე სხდომაზე, დეპუტატებმა ხმათა უმრავლესობით გადააყენეს. გოგოლაძე თანამდებობიდან მას შემდეგ გადააყენეს, რაც ირაკლი ალასანიამ კოალიცია დატოვა. გოგოლაძე ამ დრომდე რჩება პარტიაში და ფიქრობს, რომ მას პოსტი სწორედ ამიტომ დაატოვებინეს.

ახალციხის რაიონულ სასამართლოს გოგოლაძემ 18 დეკემბერს, ადმინისტრაციული სარჩელით მიმართა. გოგოლაძე საკრებულოს 2014 წლის 21 ნოემბრის №48 განკარგულების ბათილად ცნობას ითხოვდა. სასამართლომ მისი სარჩელი ნაწილობრივ დააკმაყოფილა, ბათილად ცნო ის განკარგულება, რომლის საფუძველზეც გოგოლაძე კომიტეტის თავმჯდომარეობიდან გადააყენეს. სასამართლომ საკრებულოს დაავალა შალვა გოგოლაძისთვის, იძულებით განაცდურის ანაზღაურება, 4500 ლარით და ასევე, სასამართლომ გადაწყვიტა, რომ გოგოლაძე დაუყოვნებლივ აღადგინონ პოზიციაზე.

[თამუნა უჩიძე, ახალციხე]