ირაკლი ალასანია: ‘დღეს ახალციხეში უსამართლობა დავამარცხეთ’

ეს გადაწყვეტილება ახალციხის რაიონულ სასამართლოში დღეს მოსამართლე მარიკა ჩიტაშვილმა გამოაცხადა.

„დღეს ახალციხეში ერთი უსამართლობა დავამარცხეთ და ხვალ უსამართლობას მთელ საქართველოში დავამარცხებთ! სამართლიანობა აღდგა, ეს ძალიან კარგი პრეცენდენტია. დარწმუნებული ვიყავი, რომ ჩვენი წარმომადგენელი, პარტიული კუთვნილების გამო გაათავისუფლეს და ეს უსამართლობა დღეს სასამართლომ გამოასწორა“, – განაცხადა „თავისუფალი დემოკრატების“ ლიდერმა ირაკლი ალასანიამ.

შალვა გოგოლაძე ამბობს, რომ ამ გადაწყვეტილებას ელოდა და ამ თანამდებობაზე აუცილებლად დაბრუნდება. კითხვაზე, მომხდარის შემდეგ კოლეგებთან თანამშრომლობა ხომ არ გაუჭირდება, გვპასუხობს, რომ არა, რადგან საკრებულოს წევრები მის მიმართ ყოველთვის კეთილგანწყობილები იყვნენ.

„სასამართლომ სამართლიანი გადაწყვეტილება გამოიტანა, სხვაგვარად შეუძლებელიც იყო“, – ამბობს ახალციხის საკრებულოს დეპუტატი, „ბურჯანაძე – დემოკრატების“ წარმომადგენელი ჯიმშერ გოგოლაური.

გაასაჩივრებს თუ არა ახალციხის საკრებულო ახალციხის რაიონული სასამართლოს გადაწყვეტილებას ჯერ უცნობია.

„მიღებული გადაწყვეტილება არ ჩაგვბარებია. დღეს მხოლოდ მიღებული გადაწყვეტილების სარეზოლუციო ნაწილი გამოცხადდა. უცნობია ის არგუმენტები, რის გამოც მოსამართლემ ასეთი გადაწყვეტილება მიიღო. მას შემდეგ, რაც დოკუმენტი ჩაგვბარდება, გადავწყვეტთ გავასაჩივრებთ თუ არა“, – ამბობს ახალციხის საკრებულოს იურისტი თანათინ დიაკონაშვილი.

შეგახსენებთ, რომ შალვა გოგოლაძე, საკრებულოს იურიდიული კომიტეტის თავმჯდომარეობიდან, 2014 წლის 21 ნოემბერს, საკრებულოს რიგგარეშე სხდომაზე, დეპუტატებმა ხმათა უმრავლესობით გადააყენეს. საკრებულოს 15 დეპუტატიდან მის გათავისუფლებას მხარი 10–მა დაუჭირა. გოგოლაძე თანამდებობიდან მას შემდეგ გადააყენეს, რაც ირაკლი ალასანიამ კოალიცია დატოვა. გოგოლაძე ამ დრომდე რჩება პარტიაში და ფიქრობს, რომ მას პოსტი სწორედ ამიტომ დაატოვებინეს.

ახალციხის რაიონულ სასამართლოს გოგოლაძემ 18 დეკემბერს, ადმინისტრაციული სარჩელით მიმართა. გოგოლაძე საკრებულოს 2014 წლის 21 ნოემბრის №48 განკარგულების ბათილად ცნობას ითხოვდა.



[თამუნა უჩიძე ახალციხე]