ზარზმელის ქუჩაზე ბორდიურები მოანგრიეს [Video]

ზარზმელის ქუჩაზე მცხოვრებთა ნაწილმა, ვინც „სამხრეთის კარიბჭეს“ ადგილზე დახვდა, ჟურნალისტებთან განაცხადა, რომ მართალია, ბორდიურისა და გზის წყობა არ მოსწონთ, მაგრამ ფილები ნამდვილად არ მოუნგრევიათ: „დილით გამოვედით და ასე დაგვხვდა“.

მას შემდეგ, რაც წინა დღეს გაკეთებული დანგრეული დახვდათ, მუშებმა ამ ქუჩაზე სამუშაოები აღარ გააგრძელეს და ქვედა ქუჩაზე გადაინაცვლეს.

გზის მშენებელი ფირმის, „ასტორია“ დირექტორმა, რომელიც სამუშაოებს ქვედა ქუჩაზე ათვალიერებდა, „სამხრეთის კარიბჭეს“ განუცხადა, რომ ამ ერთ შემთხვევაში ბორდიულს ისევ მოაწყობენ, თუმცა, თუ შემთხვევა განმეორდა, აღარ გააკეთებენ: „უბედურება ის იქნება, საღამოს გაკეთებული დილით ისევ დანგრეული რომ დაგვხვდეს. მეორედ გავაკეთებთ, მაგრამ მესამედ ხელს აღარ მოვკიდებთ“.

თავის მხრივ, ზარზმელზე მცხოვრებლები ამბობენ, რომ თუ გზის დაგება ამ პარამეტრებით გაგრძელდება, სამუშაოების გაგრძელების დიდი სურვილი აღარც მათ აქვთ.

„გზა არის ვიწრო, უსწორებენ ფარეხებს და ბორდიურიც სწორი კი აღარ გამოდის, დასაწყისში უფრო განიერი იქნება. ვის გაუგია ასე“...

„ორი მანქანა ვერ აუვლის გვერდს და ნახევარი გზაც ისევ ტალახი რჩება“...

გუშინ, 23 თებერვალს ზარზმელის ქუჩაზე მცხოვრებლებმა ახალციხის მერთან შეხვედრა ითხოვეს. მათთან სასაუბროდ მისულ მერის მოადგილეს, ადგილობრივებმა აუხსნეს რატომ არ მოსწონთ სამუშაოები. მერის მოადგილე ზაზა თამარაშვილი შეკრებილებს დაჰპირდა, რომ მშენებელ კომპანიას დაელაპარაკება, შპს „ასტორიაში“ ირწმუნებიან, რომ თუ თანხა არ დაამატა დამკვეთმა, პროექტში ცვლილებებს ვერ შეიტანენ.

ზარზმელის ქუჩაზე, ეგრეთ წოდებულ, ადინაცეტების დასახლებაში მცხოვრებლები ხელისუფლების ყურადღებას წლები ითხოვდნენ. დასახლებაში ამორტიზებული გზებია, არ არის განათება, არც სკვერები, არც ნაგვის ურნები და ა.შ.

„წინასაარჩევნოდ გვპირდებოდნენ გაგიკეთებთ, გაგიკეთებთ. ჯერ ძლივს დაიწყეს და ისიც ასე არასტანდარულად“, – ამბობენ ადგილობრივები.

2014 წლის მაისში, წინასაარჩევნოდ, ზარზმელის ქუჩის მცხოვრებლებთან შეხვედრისას „ქართული ოცნების“ მერობის კანდიდატი გიორგი კოპაძე და მაჟორიტარი დეპუტატობის კანდიდატი, თამარ გოგოლაძე, ადგილობრივებს ნამდვილად ჰპირდებოდნენ, რომ დასახლების ყველა პრობლემას მოაგვარებდნენ.

„ვითომ აკეთებენ, რომ მოგვათვალონ“... – ამბობენ ზარზმელის მცხოვრებლები.


შეხვედრა ზარზმელის ქუჩაზე. 30 მაისი, 2014წ. არქივი

[მანანა სარაშვილი, ახალციხე]