ახალციხეში გვარამაძის ქუჩის რეაბილიტაცია სრულდება

გვარამაძის ქუჩაზე ორი ფენა ასფალტის საფარი 2840 კვადრატულ მეტრზე დაიგო, ტროტუარებზე კი 1500 კვადრატულ მეტრზე. აღნიშნულ ქუჩაზე მოწესრიგდა მიწისქვეშა კომუნიკაციები და სანიაღვრე არხები. პროექტის ღირებულება 173 ათას ლარს შეადგენს.

გვარამაძის ქუჩაზე გზის სარეაბილიტაციო სამუშაოები ქალაქ ახალციხის მერის მოადგილემ ზაზა გელაძემ და აღნიშნულ უბანზე მერის წარმომადგენელმა ზურა სამსონიძემ დაათვალიერეს.

ზაზა გელაძის თქმით, გვარამაძის ქუჩის რეაბილიტაცია 2014 წლის ოქტომბერში დაიწყო, უამინდობის გამო კი აღნიშნული ქუჩის რეაბილიტაცია გარდამავალ პროექტებში გადავიდა.

„უამინდობის გარდა, ძალიან დიდი დრო დასჭირდა მიწისქვეშა კომუნიკაციების მოწესრიგებას. სამუშაოები ცოტახნით შეჩერდა, როგორც კი ამინდი გამოვიდა სამუშაოები ისევ გაგრძელდა“, – ამბობს გელაძე.

გვარამაძის ქუჩის რეაბილიტაციას ტენდერში გამარჯვებული კომპანია შპს „მესხეთი ავტოგზა“ ასრულებს. როგორც კომპანიის საქმის მწარმოებელი მერაბ ზაზაშვილი ამბობს, სამუშაოები 15 აპრილამდე დასრულდება.

„დღეს მოვრჩებით ასფალტის მეორე ფენის დაგებას და დაგვრჩება ეზოებში შესასვლელების მოწესრიგება, რომელსაც ხვალ დავამთავრებთ“, – ამბობს მერაბ ზაზაშვილი.



[მანანა სარაშვილი, ახალციხე]