რა შეცვალა ახალციხის თემმა სოციალურ პაკეტში

2015 წლიდან, ახალციხის მუნიციპალიტეტის ბიუჯეტიდან, პირველ და მეორე შვილზე 100 ლარის ნაცვლად 125 ლარი, მესამე შვილზე– 200, ხოლო მეოთხე და მეტ შვილზე კი 250 ლარი გაიცემა.

ცვლილებებია ერთჯერად სამედიცინო გამოკვლევასა და ოპერაციების დაფინანსებაშიც.

„სამედიცინო კვლევებზე და ოპერაციებზე გვქონდა დეფინიცია, ანუ მანამდე ვაფინანსებდით სოციალურად დაუცველებს სხვა პროცენტით და დანარჩენ კატეგორიას სხვა პროცენტით.ვინაიდან სოციალურად დაუცველებისთვის ეს პროცენტი დაბალი იყო და თანხას ნაკლებს მოიცავდა, ახლა გავაერთაინეთ და სამედიცინო კვლევები ყველას თანაბრად დაუფინანსდებათ. ჩვენ ვაფინანსებთ იმას, რასაც საყოველთაო ჯანდაცვა არ აფინანსებს, 70 პროცენტამდე, არაუმეტეს 500 ლარისა. რაც შეეხება ოპერაციებს, ვაფინანსებთ 100 პროცენტამდე, არაუმეტეს 2500 ლარისა“, – ამბობს ახალციხის მუნციპალიტეტის საკრებულოს იურიდიულ საკითხთა კომისიის თავმჯდომარე თამარ გოგინაშვილი.

მისივე თქმით, ყველა კონკრეტულ შემთხვევზე კომისიამ უნდა იმსჯელოს რა თანხის გაცემის საშუალება აქვს ბიუჯეტს: „გარდა ამისა ჰემოდიალეზიან პაციენტებსაც ვეხმარებით. ერთჯერადად 75 ლარს ვურიცხავთ“.

თამარ გოგინაშვილის განმარტებით, ცვლილებების შედეგად, სოციალურად დაუცველ ოჯახს შეუძლია ადგილობრივ თვითმმართველობას საკუთარი ნაკვეთის ნიადაგის გამოკვლევა მოსთხოვოს.

სიახლეა ისიც, რომ უფასო სასადილოთი სარგებლობა მეტ სოციალურად დაუცველ ოჯახს შეეძლება, –ქულათა ზღვარმა 150.000–მდე აიწია.

„ვინაიდან ჩვენს მუნიციპალიტეტს არ აქვს საშუალება ჰქონდეს საკუთარი უფასო სასადილო, ჩვენ მიბმული ვართ ახალციხის მერიის სასადილოზე, ამიტომ მაქსიმალურად შევეცადეთ გაგვეფართოვებინა წრე, რომ უფრო მეტ გაჭირვებულ ადამიანს შეძლებოდა უფასო კვება“, – განმარტავს გოგინაშვილი.

[თინათინ ზაზაძე, ახალციხე]