ჯიმშერ გოგოლაური: საკრებულოს თანამშრომლების ხელფასი უნდა განახევრდეს

ქალაქ ახალციხის საკრებულოს 21 ივლისის სხდომაზე, რომელსაც 15 დეპუტატიდან 14 ესწრებოდა, ერთ–ერთ საკითხად საკრებულოს თანამდებობის პირთა თანამდებობრივი სარგოს ოდენობა განიხილეს.

აღნიშნულ საკითხს 14 დეპუტატიდან მხარი ერთმა არ დაუჭირა. „ნინო ბურჯანაძე – დემოკრატიული საქართველოს“ წარმომადგენელი ჯიმშერ გოგოლაური ამბობს, რომ საკრებულოს თავმჯდომარის ხელფასი 2 700 ლარია, მისი მოადგილის ხელფასი 2 150 ლარი, საკრებულო კომისიის თავმჯდომარეების 1 500 ლარი, საკრებულოს აპარატის წამყვანი საჯარო თანამდებობის პირების ხელფასი კი 1 490 ლარი და როცა ქვეყანაში ასეთი გაჭირვებაა, საჯარო მოხელეები ამხელა ხელფასს არ უნდა იღებდნენ.

„იგივე „ოცნება“, თუ სხვა ოპოზიციური პარტიები, ყოველთვის ვაპროტესტებდით, რომ საკრებულოსა და გამგეობაში საჯარო მოხელეებს დიდი ხელფასი აქვთ, იგივეს ტოვებენ დღესაც. ეს ფაქტობრივად სასაცილოა, რა უნდა აკეთონ ამ ხელფასის ტოლფასი, როცა ქვეყანაში და რაიონში ასეთი გაჭირვებაა“, – აცხადებს გოგოლაური.

ჯიმშერ გოგოლაური ერთადერთი იყო ვინც ამ საკითხს მხარი არ დაუჭირა:
„უმრავლესობაში არიან და თავიანთ ხელფასებს ხომ არ გაანახევრებენ. „ნაციონალური მოძრაობაც“ დაეთანხმა, იმიტომ, რომ მათი დადგენილია ეს ხელფასი“.

ქალაქ ახალციხის საკრებულოს თავმჯდომარის კახა ბერიძის თქმით, სახელმწიფო სამსახურში მაღალი ხელფასი უნდა იყოს, რადგან დაბალხელფასიან სამსახურში არაპროფესიონალები იმუშავებენ.

[თამარ თოთაძე, ახალციხე]