ცვლილებები ახალციხის ბიუჯეტში

ქალაქ ახალციხის მუნიციპალიტეტის ადგილობრივ ბიუჯეტში შესული ცვლილებები დეპუტატებმა საკრებულოს დღევანდელ სხდომაზე განიხილეს.

ქალაქ ახალციხის მუნიციპალიტეტის საკრებულოს დღევანდელ სხდომას 15 დეპუტატიდან 12 ესწრებოდა. ცვლილებების ნაწილს საკრებულოს ოპოზიციამ მხარი არ დაუჭირა.

ქალაქ ახალციხის მუნიციპალიტეტის საკრებულოს თავმჯდომარის კახაბერ ბერიძის თქმით, ადგილობრივ ბიუჯეტს პროექტების შესაძენად 21 ათასი ლარი დაემატა: „გარდა ამისა, თეატრების დაფინანსების 78 ათასი ლარი სუბსიდირების მუხლიდან გადავიდა გრანტების მუხლში. თოჯინების თეატრი წელს 18 ათასი ლარით, მესხეთის თეატრი კი 60 ათასი ლარით ფინანსდება“.

ცვლილება შევიდა სოციალური დახმარების გაცემის წესში. ქალაქ ახალციხის მუნიციპალიტეტის ტერიტორიაზე რეგისტრირებული დიდი სამამულო ომის ვეტერნები, საქართველოს თავისუფლებისა და ტერიტორიული მთლიანობისათვის ომში მებრძოლი პირველი და მეორე ჯგუფის ინვალიდები, ასევე ავღანეთის ომში მებრძოლი პირველი და მეორე ჯგუფის ინვალიდები, რომელთათვისაც საჭირო მედიკამენტების საერთო ღირებულება აღემატება 30 ლარს, საჭირო დაფინანსებას მერიიდან მიიღებენ.

ბიუჯეტში შესული ამ ცვლილებების ნაწილს, საკრებულოს წევრებმა ოპოზიციური პარტიებიდან, მხარი არ დაუჭირეს.

„რადგან ბიუჯეტი როცა დამტკიცდა, მაშინ დოლარი ლართან მიმართებაში იყო 1, 65, ახლა დოლარი რა დღეშიც არის მოგეხსენებათ. რადგან ბიუჯეტს არ მივეცით ხმა, არც შესყიდვებში შესულ ცვლილებებს დავეთანხმეთ“, – ამბობს საკრებულოს დეპუტატი „ნაციონალური მოძრაობიდან“ მალხაზ გიქოშვილი.

მისივე თქმით, რაც შეეხება ომის ვეტერანების დახმარებას, ამ საკითხს „ნაციონალური მოძრაობის“ წევრებიც ეთანხმებიან.

[თამარ თოთაძე, ახალციხე]