ქალაქ ახალციხის საკრებულოს სხდომაზე გატანილი ‘უხერხული საკითხი’

დღეს, 2 ოქტომბერს, ქალაქ ახალციხის მუნიციპალიტეტის საკრებულოს რიგით მეშვიდე სხდომაზე გატანილ საბიუჯეტო ცვლილებების საკითხებს შორის ერთ-ერთი მერიის პიარისთვის ფოტო აპარატის შესაძენად 1140 ლარის განსაზღვრა იყო.

როგორც სხდომაზე ქალაქ ახალციხის მერიის საფინანსო-საბიუჯეტო სამსახურის უფროსმა ლიანა ხმალაძემ განმარტა: „აპარატი მერიას პიარისთვის სჭირდება და ქალაქის მერმა გადაწყვიტა, რომ ფოტოაპარატი საკუთარი სახსრებით შევიძინოთ“.

„ფოტოაპარატი შველის პიარს? იქნებ რაიმე უკეთესი შეგვეძინა, მაგალითად, ვიდეო კამერა. ფოტოაპარატით აპირებთ მერიის გაპიარებას?! “ - იკითხა საკრებულოს სხდომაზე ქალაქ ახალციხის მუნიციპალიტეტის საკრებულოს წევრმა „ნაციონალური მოძრაობიდან“ მალხაზ გიქოშვილმა.

მისი თქმით, საკრებულოს სხდომაზე ფოტოაპარატის შესყიდვის შესახებ საკითხის გატანა უხერხულია: „ხარჯებში რაღაცეების გათვალისწინება თავიდანვე შესაძლებელია, ბიუჯეტში უკვე არა ერთი ცვლილება შევიტანეთ. ყველა სხდომაზე ცვლილების შეტანა იმისთვის, რომ დღეს აპარატი დასჭირდათ და ხვალ შეიძლება ძვირადღირებული კალამი დასჭირდეთ, არ შეიძლება. კი არ ვამბობ, რომ ფოტოაპარატი არ იყიდონ, პირიქით, ვამბობ, რომ პიარისთვის იყიდონ რაღაცა, უფრო უკეთესი, რაც გამოადგებათ“.

ბიუჯეტში აღნიშნული ცვლილების შეტანას მხარი ყველა დეპუტატმა ერთხმად დაუჭირა.

[თამუნა უჩიძე, ახალციხე]